|
| |
Exempel des seuenden meesters
HEt was een ridder die een schoen wijf hadde die hi soe sonderlinghe lief hadde dat hi haer presencie niet ontberen en mochte des geuielt dat si te samen dobbelden Ende die ridder hadde bi gheualle een mes in sijn hant ende dat wijf alsoe spelende sloech haer hant bi gheualle in dat mes dat haer hant een weynich bloets wt gaf Als dese ridder sach dat bloet sijns wijfs wort hi soe rouwich ende veruaert dat hi van hem seluen quam ende viel ter aerden Ende sijn wijf goet hem cout water op sijn hoeft dat
| |
| |
hi een weynich verquam ende hi seyde laet den priester comen mit den heylighen sacrament want ic sal steruen om dat ic ghesien hebbe dat bloet van uwen vingher wtgaende Die priester quam ende bewaerde hem metten heyligen sacramente ende hi sterf sonder vertrec Daer na soe wort daer groot gescrey ende droefheit gemaect ende sonderlinghe dat wijf na dat graf gesloten was ghinc si leggen opt graf ende maecte daer soe groot misbaer dat haer nyemant van daen brenghen en mochte Ende dede een ghelofte dat si nimmermeer van dier stede en soude comen want si als een tortelduue om haers mans liefte daer woude steruen Doe ghinghen haer vrienden tot haer ende seiden wat mach dit sijnre zielen profijt wesen dat ghi hier blijft ende steruet Beter isset dat ghi te huys gaet ende gheeft mildeliken aelmissen voer sijn ziel dat sal hem bet helpen dan dat ghi hier bliuet Doe antwoerde dat wijf swiget want ghi sijt alle quade raetsluden Ghi en mercket niet dat ic verscheiden moet wesen van minen lieuen man die om een luttel bloets van mi gelopen gestoruen is daer om en wil ic nimmermeer van hem ghescheiden wesen Als dit haer vrienden saghen maecten si haer een cleyn huyskijn bi dat graf haers mans ende deden haer hebben al dat si behoefde ende
| |
| |
ghinghen wech. op dat haer die enicheit verdriet maken soude ende alsoe weder soude comen tot geselscap der menschen In die stat was een recht wanneer een ghehanghen wort dat die stedehouder des heren dien mit ghewapender hant alle dien nacht waken moste Ende haddet gheschiet dat die ghehanghen mensche hem gestolen worde so soude die stedehouder alle sijn lant verliesen ende sijn lijf soude daer toe staen in des heren handen Op dien dach dat desen ridder begrauen was waecte die stedehouder nae dat recht vander steden bi der galghen en was daer bi houdende mit sine paerden. ende dat was buten der stat niet verde van dat kerchof die oeck buten bi der stat was Doe wort die stedehouder so seer van couden beuanghen. dat hem dochte dat hi van couden steruen soude. waert dat hi hem niet en warmede Ende aldus hier ende daer omme siende sach hi opt kerchof vuer ende toech daer toe: Ende als hi daer quam clopte hi an dat husekijn om in te wesen Dat wijf vraechden. wie is daer die inder nacht cloppet an mijn huuskijn daer ick sitte also weemoedich Hi antwoerde Ick ben die stedehouder die so grote coude lide dat ick van couden steruen sel. ten si dat ghi mi ter stont in laet om mi te warmen Dat wijf seide Ick hebbe anxt dat ic v in liet dat ghi tot mi spre\ken
| |
| |
soudet alsulcke woerden daer ic seer of bedroeft soude worden Hi seide laet mi in Ic beloue v dat ic doen noch spreken en sel dat v mishaghen soude Doe liet si hem in Ende doe hi bi dat vuer sat ende warm was gheworden. seide hi tot haer O vrou ist dattet v belieuen woude ic soude gaern een woert tot v spreken Si seide Segt here Hi seide Ghi sijt vrouwe een scoen ende edel wijf ende oec rijck. ende daer toe ionc van iaren. ende waert niet beter dat ghi in uwen huse woendet. ende aelmissen gaeft voer uwes mans siel. dan hier v seluen te verderuen mit huylen ende screyen Si antwoerde O ridder hadde ic dit gheweten. ic en hadde v niet in ghelaten Ic segghe v als ic dicwijl den anderen alle gheseit hebbe Het is v wel condich dat mijn man mi also lief heeft ghehadt dat hi om een weynich bloets mijns vinghers ghestoruen is waer om ic hier om sinen wille steruen sel Doe dit die ridder hoerde nam hi oerlof ende ghinc totter galghen wert Ende als hi daer quam sach hi dat die ghehanghen mensche ghestolen was vander galghen ende wort daer om seer bedroeft ende seide wee mi. wat sel ic gaen doen want nv al mijn goet ende mijn lijf verloren sijn Aldus gaende mit groter mismoet. niet wetende werwerts hi hem keeren soude of wat hi soude doen. bedachte
| |
| |
hi hem te laetsten dat hi gaen woude tot die deuote bedroefde vrouwe. ende claghen haer den druc sijns herten of si hem enighen troest mochte gheuen Ende als hi daer ghecomen was cloppede hi an. ende si vraechde die saeck cloppens Doe seide hi O lieue vrouwe Ick ben die stedehouder die onlanghe hier te voren bi v was Ic soude v gaern die heymelicheyt mijns herten te kennen gheuen Daer om bidde ic v om die minne gods doet mi op dat ic ingaen mach Doe dede si hem die doer op ende hi ghinc in. ende seide tot haer O alre liefste vrouwe Ic come nv uwen raet te soeken. want ghi wel weet datter stat recht is. dat so wanneer enich mensche ghehanghen wort ende dan vander galghen ghestolen wort. dat dan des stedehouders goet ende lijf in des heren handen comen Nv ist leyder ghesciet dat die moerdenaer vander galghen ghestolen is ter wilen dat ic mi warmede. daer om bidde ic om goods willen dat ghi mi goeden raet gheuen wilt Doe antwoerde si Ic hebbe medeliden mit v. want ghi bi dat rechte ofte statuut des landes alle uwe goet verloren hebt ende dat uwe lijf in des conincs handen staet. doet nochtant minen raet ghi en selt noch v goet noch uwe lijf verliesen Doe antwoerde hi Daer om come ic tot v ende sel hopen van v ghetroest te worden Doe seide si Belieftet v
| |
| |
yet mi te nemen tot een huysvrouwe Die ridder antwoerde Och of ghi dat doen woudet. mer ic hebbe anxt dat ghi v alte seer vernederen soudet dat ghi mi nemen sout tot enen man die een arm ridder ben Doe antwoerde si Siet ic gheue mijn consent daer toe. ende hi weder. ende ic consenteer in v mijn vrouwe alle die daghen mijns leuens Doe seide si Ghi weet wel dat mijn heer ghisteren hier begrauen is. die om der lieften van mi ghestoruen is Nv gaet toe ende nemet hem vten graue ende hanghet aen die galghe in die stede des moerdenaers Die ridder seide waerliken vrouwe dat is goet raet Doe ghinghen si te samen ende deden dat graf op. ende die ridder seide Hoe sellen wi nv doen Die moerdenaer doe hi gheuanghen wort verloes hi twee van sijn opperste tanden Ende waert dat die moerdenaer besocht worde biden verloren tanden soude ic dan seer bescaemt worden Doe seide si Neemt een steen ende slaet hem die twee tanden wt Die ridder antwoerde O vrouwe ic en mach dat niet doen. want doe hi leefde waren wi grote lieue vrienden ende ghesellen. ende het waer mi oec ontamelic dat ic dat nv soude doen in sijn dode lichaem Si seide Ic selt dan doen tot uwer lieften. ende nam een steen ende sloech den doden die tanden wt Ende doe dat gheschiet was. seide si Neemt
| |
| |
hem nu ende hanghet hem an die galghe Noch seide die ridder en derf ic dat niet doen want die moerdenaer doe hi ghehanghen wort creech een wonde in sijn voerhoeft ende hadde beide sijn oren verloren Ende daer om wortet dan besocht so soude ic bescaemt worden Doe seide si Treck wt v swaert ende maect hem een wonde ende snidet hem sijn oren of Hi seide O lieue vrouwe dat moet verre van mi wesen dat ic dat sijn dode lichaem doen soude dien ic so seer lief hadde doe hi leefde Doe seide si Gheeft mi dat swaert. ick selt doen om uwen wille ende si nam dat swaert ende sloech een goeden manlicken slach in des doden voerhoeft. ende sneet hem oec zijn oren of Ende doe si dat ghedaen hadde. seide si. hanghet hem nv koenliken sonder vresen Die ridder seide. noch en derf ics niet doen. want die moerdenaer hadde oeck verloren sijn manlicheyt. worde daer om dese dode ghehanghen ende het beuonden worde dat hi sijn manlicheyt hadde soe soude al onsen arbeyt te niet wesen Doe seide si Ick en hebbe van minen leuen nye so bloden mensche ghesien als ghi sijt. neemt vrylijcken een mes. ende snijt hem sijn manlicheyt of Hi seide Och vrouwe ic en mach dat doch niet doen want ghi weet wel wat een man is sonder die manlicheden Doe seide si Noch sel ick dat om
| |
| |
uwen wille doen ende nam een mes. ende sneetse hem of ende seide Hanghet nv den rustier sonder sorghe die aldus leeliken ghecort ende mismaect is Daer na ghinghen si te samen en hinghen dat lichaem an die galghe Ende also wort die stedehouder verlosset. ende vry vanden coninc Als dit ghesciet was seide die vrouwe Nv sijt ghi verlosset bi minen rade van allen last ende druck Daer om wil ic nv dat ghi mi trouwen selt voer die heylighe kerke Doe antwoerde die ridder Ick hebbe gode van hemelrijken ghelooft dat ic gheen wijf nemen en sel also langhe als ghi leeft. ende dat wil ic houden Ende ic begheer dat ghi mi niet langhe vertreck doen selt Daer om segghe ick di O du onscame wijf die onder alle wiuen die snoodste biste ende die boeste. wie goeders soude v ten wiue nemen die dien eerbaren ridder ende den goeden minlijcken here die uwen man was die om een weynich bloets dat van uwer hand ghedropen was van uwe lieften ghestoruen is. dien ghi nv hi doot is so iammerliken mismaect hebt. ende hebt hem sijn tanden wt ghesmeten. sijn oren of ghesneden. ende oec sijn manlicheyt. ende oeck in sijn voerhooft ghewondet wie duuel soude v tot enen wiue nemen. mer op dat ghi ghenen goeden man niet meer en bescaemt soe neemt nv v loen Ende hi tooch wt
| |
| |
sijn swaert ende sloech haer dat hoeft of ten eersten slaghe Doe seide die meester Heer keyser hebt ghi dit wel verstaen Die keyser antwoerde Ja ic meester Onder allen wiuen was dit die alre quaetste hoer Ende die ridder gaf haer haer rechte loen dat si nyemant meer en soude confunderen Ende voert seide die keyser O meester mocht ic minen soon eens horen spreken ic en soude niet veel meer begheren langher te leuen Doe seide die meester Morghen heer keyser seldi uwen soon horen spreken mit groter wijsheyt voer allen vorsten ende heren uwes keyserrijckes. ende sel openbaer maken alle dat sceel dat tusschen der keyserinnen ende ons geweest is als ic hope Daer nae sonde die meester den keyser ende ghinc wech Als dit ghesciet was vergaderden die seuen meesters ende quamen bi een om raet te nemen in wat schijn ofte habijt. dat si des keysers soen vter gheuanghenissen nemen souden ende brenghen hem ten pallaes. ende doe si ghinghen te samen totten kinde daer hi gheuanghen sat vroech voer den middach om sijn raet ende wille hier of te weten Doe seide die soon des keysers Het sel mi wel belieuen al dat v behaghelijken sal wesen mer en weest niet begaen van mijn antwoert dat ic gheuen sel of wat ic sel spreken. want ick ons allen
| |
| |
sel mit groter eeren verlossen ende goet antwoert gheuen op alle dat mi voertcomen sel: Doe dit die meesters hoerden. worden si seer blide ende toghen hem aen een purpuren cleet ende een gulden mantel. ende ordineerden dat twee meesters voer hem ghinghen Ende aen elcker side van hem een Ende die ander drie volgheden hem nae Ende oeck ghinghen voer hem vier ende twintich speel luden van alreley manieren van melodie ende brochten hem soe totten pallaes Als die keyser hoerde die menigerhande grote melodien. vraghede hi wat dat was. doe wort hem gheseyt Heer keyser uwe soen comet ende wil voer v ende allen uwen heren spreken ende hem ontsculdighen van allen onrecht dat hem op gheleyt is Die keyser seide: O dat is een goede bootscap. och of ick minen soon mochte horen spreken Als die soen aldus ten pallaedse ghecomen was ende hem sijn vader te ghemoet ghinc so was dit dat eerste woert dat hi sprac Weest ghegroet mijn lieue vader ende eerwaerdighe here Doe die vader sijns kints stemme hoerde wort hi van binnen beroert ende van groter blijscappen quam hi bi nae van hem seluen ende viel ter aerden mer die soen nam hem blideliken op ende stelden hem weder dat hi tot hem seluen quam Doe began die soen
| |
| |
te spreken Ende daer wort so groten gherucht ende gheloop vanden volcke datmen hem niet en mochte horen spreken Als dit die keyser sach. liet hi ghelt op die straten werpen. op dattet volc onledich wesende mitten ghelden te crighen sijn pallaes vanden volcke ledich soude sijn om dat hi sijn kint mochte horen spreken. mer dat volck en achtede dat ghelt niet Doe dit die keyser merckede. gaf hi een ghebot datmen swighen soude op dat lijf te verbueren Ende als dat ghesciet was wort daer silencium Ende die soen began te segghen O eerwaerdighe heer. eer ic yet segghe bidde ic dat die keyserinne mit alle den ghenen die van haere cameren sijn hier teghenwoerdich sijn Ter stont gheboet die keyser der keyserinnen dat si ende al haer camer ghesin comen souden sonder vertreck Die keyserinne quam daer al beuende mitten haren Doe dedese die soen staen voer allen den volcke ende alle haer camerieren in ordinancien daer bi datse alle dat volck soude moghen sien Doe seide hi heer keyser buert op uwe oghen ende siet die camerier die daer staet met groenen ghecleet. welcke als ghi weet die coninghinne bouen alle die andere lief heuet die wil ick dat ghi die naect laet maken voer v alle dat ghi sien moghet wat si is:
| |
| |
Die keyser seide Soen dat soude ontameliken wesen datmen een wijf voer ons allen naect soude maken Hi seide heer vader ist dattet een wijf schijnt te wesen so selt mijn scande wesen mer ist anders so moet si beschaemt bliuen Als si doe ontcleedet was soe wortet van allen ghesien ende gheuonden dattet een man was Doe seide die soen Siet heer aldus menigher tijt heuet desen ribaut mit uwen wiue in uwe camer in ouerspul gheweest ende ghi en hebt die saec niet gheweten waer om die coninghinne hem soe lief hadde Doe wort die keyser verwoet ende gheboet datmen die keyserinne ende den ribaut beide soude verbarnen Die soen seide En wilt heer vader die sentencie niet verhaesten eer dat ick loghenachtich ende valsche mach maken die saken die si mi op gheleyt heeft ende men beuinden mach mitter waerheyt dat si mi valschelicken besculdicht heeft Doe seide die vader Mijn lieue kint ic sette alle dat vonnisse in uwen handen Die soon antwoerde Ist dat si beuonden wort inder loghen so sel si vanden rechter veroerdelt werden Mer nv mijn lieue vader. hoert voert op die tijt doe ghi om mi seyndedet dat bi haren ingheuen ende raet gheschiedet Doe saghen mijn meesters ende ic inden sterren. waert dat ic binnen seuen daghen een woert wt mi\nen
| |
| |
monde hadde laten gaen dat ick dan mit leeliker doot soude hebben ghedoot worden ende dit was die saeck mijns swighens Ende dat die keyserinne mi op seide dat icse vercraften woude dat lieghet si valschelicken. mer si dede haer beste daer toe dat si mi daer gaerne toe hadde ghebrocht Ende doe si mi daer toe niet brenghen en mocht. gaf si mi ynct papier ende penne dat ic haer scriuen wilde waer om dat icse versmade Ende als ick ghescreuen hadde dat ick soe leelicke swaer sonden niet doen en woude noch oec vaders boemgaert vul maken doe scoerde si haer seluen ende maecte haer seluen bloedich ende riep mit groten gheruchte ende leyde mi doe die onrechte clachte op mi Als dit die keyser hoerde. soe sach hi haer an mit enen wreeden aensichte ende seide haer toe O du onsalighe wijf en was v niet ghenoech tot uwer lusten te boeten dat ghi mi haddet ende uwen rybaut. ghi en woudet oeck noch minen soom hebben Doe viel si den keyser te voeten. ende badt hem om ghenade Die keyser seide: O vermaledide wijf. du biste der ghenaden onwaerdich. want du den doot verdient hebste in drien manieren Ten eersten want du ouerspul ghepleghet hebt onder mi Ten anderen dat du minen soen ter sonden verwecket hebste. ende
| |
| |
hem mit onrecht die sonde op gheleyt Ende ten derden mael. want du mi alle daghe mit dinen woerden daer toe hebste verwecket dat ic minen soen soude doden Ende daer om sel die wet ouer di gheuen niet min dan die sentencie des doots Doe seide die soen Ghi weet wel heer vader hoe ick om die loghen die si mi op leyde alle daghe gheleyt wort ter galghen ende dat mi onse lieue here bi minen meesters verlosset heeft. mer nv mijn lieue vader oft soe waer dat ick voer v dat rijck regierde soe also die coninghinne van mi versierde dat ic ende mijn meesters daer om arbeydende waren om v te verderuen ende mi int rijck te brenghen En soudet ghi dan niet min arbeyts ende sorghen hebben die ghi altijt hebbet om dat rijck te regieren dat ick v dan niet houden en soude voer minen vader dat verde van mi moet wesen: Ick en soude v houden voer minen vader daer icket beghin van minen wesen of ontfanghen hebbe. ende als minen here ende ghecroenden keyser ende volbrenghen alle dinghen tot uwen ghebode dat ick dan niet min en soude doen dan die soon. welcken sijn vader in die zee werp te verdrencken. om dat hi gheseyt hadde. dat hi een toecomenden here van dien lande ware Ende nochtant die soon bi der gracien
| |
| |
godes int leuen onthouden wort dat nochtant niet en was in sijns vaders hinder mer grote profijt. also suldi oec vernemen dat mijn leuen ende regiment nymmer meer wesen sel in uwer scade ofte scande. mer tot uwer groten profijt ende wille Doe seide die keyser Die here si des ghebenedijt lieue soen van dier uren dat ic v gecreghen hebbe tot minen soen dien ic also wijs ende goet in allen dinghen vinde. mer nv wilt vertrecken in een narracien daer wt ic uwe wijsheyt bet beuinden mach in v Die soen seide: Wilt dan ghebieden silencium te houden. ende den volcke te swighen hent ic mijn reden gheeyndet hebbe. ende datmen dan iusticie doe vander coninghinne ende van mi Doe gheboet die keyser den volcke te swighen ende die soen began te vertellen als hier volghet
|
|
Auteursrecht onbekend