Dit is een schoon suverlijck boeckxken, in denwelcken ghy vinden sult veel schoone leysenen, ende gheestelijcke liedekens


Noch een schoon gesang van der geboorte Christi,
op de wijse: Dies est. Een kindeken so lovelijc, Is ons geboren huyden, van eener joncvrou suyverlijc, Tot troost ons arme luyden, Waer ons dat kindeken niet geboren, so waren wy allemael verloren, dat heyl is onser alle, Ey du soete Iesu Christ, dat du mensche gheworden bist, Behoet ons voor die Helle. Die tijt is nu gants vreugdelijc, te loven Godes namen, dat Christus van den hemelrijc, op eerden is gecomen, het is een grote demoedigheyt, dat god van den hemel by ons deyt, Een kint is hy geworden, sonder alle zonden ons gelijc, daer door wy worden eeuwig rijc, Draegt onser zonden borden. Wel hen die dit gelovende is, met der herten gants betrouwen, Dien wort die saligheyt gewis, wel hen die daer op houwen, Dat Christus heeft genoeg gedaen, Voor ons daerom is hy uytgegaen, van God den eewigen vader, o wonder
[pagina 92]
over wonder daet, Christus droegh onse misdaet, En stillet onsen herder. Des danckt hem alle Christenheyt Voor sulcke grooten goeden, Ende bidde zijn barmhertighz, Dat hy ons voort behoede, voor valsche leer ende boosen waen, daer wy langen tijt in hebben gestaen, Hy wil ons dat vergeven, God, Vader, Soon ende heylighen Geest, Wy bidden van dy aldermeest. Laet ons in vreden leven.