De Saksenspiegel in Nederland

Van denselven ende ander dinc. CCCV. (67.)

So wien dien here goet verdeelt, ende hi syn goet wt tiet ³) ende coemt tot dien daghe daer hi ghededingt is ⁴), daer ne moet hi niemanne brenghen hine si des heren man. Brenghet hi oec ⁵) die des heren manne niet ne syn, hi moet daer omme wedden voer yeweliken sonderlinghe. Eer hi oec voer den here come, hi sal zweert, messes ende sporen ende hoet ende huven ende hantscoen, kappen ende alle wapen en wech doen. ⁶) Of die man hem an desen dinghen versumet ⁷), hi wert daer omme weddehaft. Oec doe hi van hem vingherlyn, voerspan ende al yseren doer sommer lude waen, ende ringhe van gordele ende spanghen. ⁸) Dat ne segghe ic van anders niemenne, die dese vare hebbe, sonder van dien die die here ghededinghet hebbe om sine sculdinge ⁹) So waer oec die man den here aenspreect, wert hem daeromme ghededingt, hine is den here ne gheenre vare sculdich ¹⁰) dan als een ander syn man. Die man ne is den here noch die here dien manne niet sculdich te antwordene te leenrechte omme scaden, dien hore een den anderen hevet ghedaen ¹¹) eer hi syn man wert.