De Saksenspiegel in Nederland

Hoe men leenrecht houden sel. CCXCVIII. (65 § 17.)

In beslotenen hove noch onder dake noch in borghen ne moet die here ne gheen leenrecht houden. Alse die here tot den derden male wachtet sines mannes want die sonne ondergaet ⁴), so vraghe hi dan watter rechtes omme si. ⁵) So vint men te rechte dat hi syn dedinghe ghetughen sal, dat eerste ende dat ander ende dat derde, yewelic mit tween sonderlinghen synre mannen. ⁶) Deser lude tuuch sal aldus gaen: Here, ic verpleghe mi des bi uwen hulden ⁷), dat ghi ghededinct hebt ⁸) N. in deser stat ende syns daer ghewachtet hebbet also leenrecht is, dat sach ic ende hoerde ende ic bin des te ghetuuch. ⁹) Na yewelikes mannes tughe sal die here vraghen, of hi mit hem volcomen si also dattet hem helpende si tot sinen rechte. ¹⁰) So wie tuuch seghet bi syns heren hulde dat hi weet van dier reden ¹¹) daer hi omme ghevraghet is, of bi syns heren hulden hem verpleghet ¹²) dat hi daer niet af ne weet, sone sal men hem niet veerre vraghen.