De Saksenspiegel in Nederland

Van den selven. CCLXXVII. (55 § 4.)

Goet dat den manne gheliet wert op sine trouwe, daer mach hi leenrecht mede doen sinen manne ende erftet op sinen sone, ende ne dorvent niet oplaten den here om lossinghe ⁴), sine hebbent selve ghelovet. Die man ne is niet sculdich te leestene sines heren ghelovede noch dat kint sines vader, omme te latene sijn goet. ⁵) Goet mach die here setten ⁶) sonder manscap enen manne. Dat staet op des heren trouwe dat hyt den manne bliven late ⁷), wilt hem die here breken mit synre onscout, dat moet hi wale doen, die man ne moghe hem des vertughen dat hyt hem voer gherechte gheset ⁸) hebbe. So wat oec die here malliken liet, dat staet op des mannes trouwe, weder hijt late of ne doe na sine lovede ⁹), die here ne moghet vertugen dat hyt binnen leenrechte ghelovet hebbe. Dien goet gheliet wert hine is niet sculdich dat goet op te latene sines heren sone op losinghe noch niemanne an dient gheboert na sinen dode ¹⁰), hine hebbet ghelovet op te latene.