De Saksenspiegel in Nederland

Van leen te verlien. CCLXIIII. (43.)

Of die here sinen manne syn goet verdeelt dor enes anderen mannes claghe, dien claghere sel die here wisen in die ghewere des goedes, die eer des gheens was dient goet verdeelt is. Doch hevet die ghene sine iaertale wt te tien syn goet. ²) Binnen die iaertale, dat die man syn goet wt tien sal, sterft hi ³), hi ervet op sinen sone ende volghet an enen anderen here daer mede, of syn here stervet of oplatet of vercoept of dat hyt hem ontseghet. ⁴) Niet ne mach hi oec ledighes goedes verlien, hine hebbet wt ghetoghen ieghen sinen here. ⁵) Coemt et oec an enen anderen here, die man ne derf syn goet iegen hem niet wt tien ⁶), hi sal oec volghen sinen goede mit leenrechte. Die sone ne derf oec in des vader stat niet wt tien ⁷) syn goet ieghen den here of die vader sterft. Also dicke als des mannes leen an enen anderen here coemt, also dicke verniet hem sine iaertale. ⁸)