De Saksenspiegel in Nederland

Van leenrecht te weygheren. CCXLVII. (26 § 11.)

Weyghert dat kint leenrechte te doene sinen mannen, so et eerst tot sinen iaren coemt, so sullen sys anderweiden sinnen³) of si veriaren hem weder dat kint. Sterft een man die sone hevet binnen der iaertale, dat hi goet ontfaen sal, daer ne is dien sone dat goet niet ontverret, al ne haddet die vader niet ontfanghen die wile hi hem niet veriaret en hebbe.⁴) Sterft oec eens heren sone binnen der iaertale, dat die manne hore goet ontfaen sellen, si volghen horen goede so waert henen vaert, ende verliesen daer mede niet. Die here ne moet des mannes goet niet tunen mit latene ⁵), ten si dat hyt van meer heren hebbe dan van enen. Laet hyt oec weder recht, so sal die mynre deel den meerren volghen. Of die here sines mannes goet den minren deel laet dat hi van enen here hevet, dat ne derf die man van nieman ontfaen dan van den overen here. ⁶)