De Saksenspiegel in Nederland

Van vanen leen te verlien. CCXXXV. (20 § 5.)

Bisscope goet ende vanen leen sal die coninc ganz lien ende niet tween.³) So wie oec van enen vorsten beleent is die vanen leen hevet hine derf dat leen van nieman ne ontfaen die vanen lenes dervet, al si hi een gheboren vorst. Die sone behout des vaders scilt te leenrechte, die hem evenbordich is, die wile hi hem mit manscap niet en nederet.⁴) Of die sone in des vaders stat niet en wil man werden, daer mede ne is syn scilt niet ghehoghet.⁵) Et ne hoghet niet des mannes scilt dat vanen leen of hem dat gheliet wert. Et ne eerft ne gheen leen dan die vader opten sone.⁶) Na des vader dode binnen iare ende binnen dage come die sone tot sinen heren ende biede hem sine manscap mit sinen ghevoudenen⁷) handen ende ga hem also na of die here sta, dat hi hem ghereyken moghe.⁸) Sit oec die here, so sel hi voer hem knielen. Somme lude seggen dat hi die hande sel waghen.⁹) Des ne is niet, dan also die man gaet tot dien here, daer hi staet, of knielt voer hem, daer hi sit, so waghet hem al syn lyf ende moeten oec die hande waghen.