De Saksenspiegel in Nederland

Van den selven. XIII. (I. 6. § 2.)

So wie dat erve neemt die sal dor recht die scout gelden ³), also verre als dat erve ende die varende have waret. Diefte noch roef noch dobbelspel en is hi niet sculdich te gheldene noch en ghene scout, dan die hi weder stadinghe ontfinc ⁴) of borghe was worden. Die scout sal die erfnaem ghelden of hys gheinneret wert als recht is mit ⁵) tween ende tseventich mannen, die alle vri scepenbaer syn of echt gheboren lude laten ⁶). Men sal oec den erfnamen ghelden dat men den dode sculdich was. Dien scout die de man selven sculdich was dien en derf nieman inneren, hi selse bekennen of besaken. So wie so yet borghet of lovet hi selt ghelden. Ende wat hi doet hi selt stade houden, wil hys oec verzaken daer na hi ontvoeret hem mit sinen ede, so wat hi voer gherechte niet gheloeft en heeft ⁷). So wat hi oec voer gherechte doet des vertughet hem die zacwoudich ⁸) mit tween mannen ende die rechter sal die derde syn.