Reis van Jan van Mandeville

Hoe dat coninc alexander dese luden voerscreuen dede ontseggen.

Bi tiden die leden sijn die coninc alexander sende in dit lant ende dede die liede ontsegghen, om dat hi dat lant winnen woude. Ende si senden hem boden ende lettren van des lants weghen droeghen, aldus sprekende: Coninc alexander, wat mochte dien mensche ghenoech

[fol. 151ra]

sijn ende ghenoeghen, die alle die werelt niet ghenoech en is noch en ghenoecht? Ghi en sult gheen dinghen in ons vinden, daer om dat ghi ons orloghen sult, want wi en hebben ghene rijcheit, noch wi en begheren ooc ghene, want al dat goet van onsen lande, dat is onder ons ghemeen. Dat eten om onsen lichame mede te onthouden sijn onse rijcheden. Ende voor den scat van suluer ende van goude maken wi onsen scat van payse ende van eendrachticheden deen metten andren ende voor schoon chieringhe ende palleringhe so hebben wi een keytiuich cleet om ons onreinen lichamen mede te decken. Onse wiuen en sijn niet ghepalleert noch ghechiert om yement te behaghen, mer scone chieringhe ende palleringhe soudense houden voor sotheit,

[fol. 151rb]

alsmen den lichame pijnt scoonre te maken, dannen god ghemaect heeft van sijnre naturen. Si en weten, wat scoonheden meer eysschen, dan hem god heeft ghegheuen, doe hise sciep. Die aerde dient ons van tween dinghen: si draecht ons ende brenct ons, dat ons noodtorft is bi te leuene, ende si is onse graf, als wi steruen. Ende wi hebben enen ewighen pais tote nv ghehadt, daer ghi ons of wilt beroeuen ende onteruen. Ende wi hebben enen coninc niet om die quade te pinen, want hi en vint gheen liede, die quaet doen, mar allene om edelheit te houden ende ons te lerene, dat wi onderdanich sijn. Want die gherechte of die misdadighe te pinen en heeft gheen stat onder ons, want wi en

[fol. 151va]

doen niement gheen dinc, wi en wouden, dat ment ons dade, so dat tgherechte onder ons gheen stat en heeft, so dat ghi ons niet en moghet nemen dan onsen pais, die altoos gheduert heeft. Ende doe alexander dese lettren hadde ghelesen, peynsde hi, dat hi herde quaet dede, maecte hi onder hem onruste ende onboot hem goeden vrede ende datsi van hem ghenen vaer hebben en souden ende datse wel hoeden ende wachten haren goeden mure ende haren goeden paeys, also si tote nv toe ghedaen hadden.