Reis van Jan van Mandeville

Een ander eylant, daer nemen si hoor dochteren ende niften wel te wyue, ende ander dinck.

Ende bi desen eylande is noch een eylant, daer herde vele volcs in is. Dese liede en souden om ghene dinc eten hasen, noch hennen, noch ganse, nochtan voeden sire ghenoech allene om dat sise zien willen, mer si eten wel van andren beesten sonder van desen ende drincken ooc vanden melke. Jn dit lant nemense wel te wiue haer sustren, haer dochtren ende haer nichten. Ende alse x manne of xij in een huus wonen, een yghelijc mans wijf is allen den andren van dyen huyse ghemene, so dat een yghelijc gaet slapen mit der gheenre,

[fol. 148vb]

die hi wil enen nacht ende mit eenre ander enen andren nacht. Ende alse die wiue enich kint draghen in desen eylande, men gheuet tkint den ghenen, die eerstweruen bi haer lach, so dat gheen man en weet, of die kinder sijn sijn of eens anders. Ende segghen onderlinghe die manne deen toten andren, al ist dat si ander liede kinder voeden, ander liede voeden ooc die hare. Jn dit lant ende al indien dore sijn vele cocodrillen, dats een maniere van langhen serpenten, alsic voren seide. Des nachts wonen si int water ende des daechs op die rootsen in die aerde in holen ende si en eten niet in al den winter, mar si ligghen in haer hole, alse die serpenten doen. Dit serpent doot die liede ende eetse al wenende ende alset eet, het roert die ouerste

[fol. 149ra]

kinnebacken ende niet den onderste. Ende daer en is gheen water in. Jn dit lant ende in vele andre lande daer omtrent ende noch op dese zide saeitmen alle jaer cottoen saet. Daer of wassen cleyne boomkijn, die cottoen draghen, so dats herde vele int lant is. Jn dit eylant ende in vele andre eylanden is een maniere van enen sterken houte, dat herd is. Die die colen onder dassche decte van desen houte al berende, si souden een jaer of meer al bernende bliuen. Die bome van desen houte gheliken binalics in bladeren ende in andren zaken den ghenoeure bome. Daer sijn ooc enighe bome, die niet bernen en mochten noch verrotten in gheenre manieren. Ende daer sijn ooc noot bome, die noten draghen also groet als eens mans

[fol. 149rb]

hooft. Daer sijn ooc vele orafles in dit lant, die si heten griffans, dat is een beeste, die niet hogher en is dan een orsse, mer het heeft den hals wel xx cubitus lanc ende heeft dat houet ende die hoorne als een herte. Het soude wel bouen een groot huus zien. Ende in dit lant sijn ooc vele camelioene, dat sijn cleyne beestkijn alse wilde chieronne ende gaen altoos mit gapender kelen, om dat si vander lucht leuen, noch si en eten noch en drincken ghenen tijt. Ende si verwandelen dicke willen hare verwe ende hare ghedaenten, want sulken tijt sietmense van eenre verwen ende sulken tijt van eenre andre. Ende si moghen hem verwandelen in alre\hande

[fol. 149va]

verwen sonder in wit of in root. Daer sijn ooc grote serpenten van vj^xx voete lanc ende daer sijn ooc vele andere van menigher verwen, strijpte ende rode ende groene, gheluwe, violetten, swarte ende al gheplect ende sijn van iiij of van .v. vademe lanc of meer ende wonen altoos in holen van steenrootsen of ander holen, die si in daerde maken. Ende daer sijn sulke, die opt hooft ghecamt ende ghecroont sijn ende sijn bina al recht op haer voete ende hebben die kele altoos open, daer vte druupt venijn. Daer sijn ooc wilde verkene van menigherhande verwen, also groot also hier grote ossen sijn ende sijn al vol plecken alse een jonc welpken. Ende daer sijn

[fol. 149vb]

herten also groot, alse hier wilde verkene sijn. Ende daer sijn ooc witte leuwen. Ende daer sijn ander beesten, die also groot sijn alse orsen, die heten louherans ende elwaer heten sise odousches ende hebben thooft herde zwart ende int voorhooft iij snidende hoorne alse zwaerde ende sijn lichame is faues, dat is gheelachtich ende sijn felle beesten ende men jaechter die olifanten mede ende dootse. Ende noch sijn daer herde quaderhande beesten ende herde wreet ende en sijn niet vele meerre dan een beere ende hebben thooft als een wilt euer ende hebben vj voete ende an elken voet twee herde snidende clauwen of naghelen herde breet ende hebben den lichame van enen wilden euer ende den staert na enen

[fol. 150ra]

leuwe. Ende daer sijn vledermuse also groot alse rauene. Ende daer sijn rode ganse, die drie weruen groter sijn dan onse ganse hier te lande ende si hebben thooft ende den hals ende die borst al zwart. Ende vele ander beesten sijn in dit lant ende daer omtrent ende herde menigherande maniere van voghelen, dat alte lanc werden soude te vertrecken.