Reis van Jan van Mandeville


Van abraham ende sijn gheslachte. Jtem op die rechter zide van deser doder zee so bleef loths wijf staende tenen soutsteen al rechte, om dat si achter waert sach, doe dese voirscide steden versoncken. Dese loth was arams zoon abrahams broeder ende sara abrahams wijf was loths suster Ende dese sara hadde xc jaer, doe si ysaac wan. Ende abraham hadde enen anderen zoon die hiete ysmahel, die doe xiiij jaer hadde, dien hi an agar ghewonnen hadde hare camerieren. Ende doe ysaac viij daghe out was doe deden abraham besniden
[Folio 51rb]
ende ysmahel mede, doe hi xiiij jaer out was. Daer om die joden die comen sijn van jsaac doen hem besniden ten viij daghen ende die sarrasinen die van hismaels gheslachte sijn doen hem besniden te xiiij jaren. Binnen deser doder zee loept die jordane ende daer wart si verloren, want men sietse niet meer noch vorder. Ende dit es in eenre milen na sinte jan baptisten kerken ende ten westen waert een luttel beneden daer hem die kerstene plaghen te baden ghemeenlijc. Ende in eenre milen na der jordanen es die riuiere loths, doer die welke jacob leedt, doe hi van die mesopotamen quam.