Reis van Jan van Mandeville

Vanden soudaen ende anders.

Ende weet dat die soudaen is here van vj. conincriken, die hi mit crachte al heeft ghewonnen. Dat eerste is tconincrike van canopat, tander van egypten, terde van jherusalem ofte iherosolimitam, vanden welken dauid ende salomon coninc waren, tfierde is tconincrike van halappe in tlant van omat, tfijfte is tconincrike van surien, vanden welken damas was die hooft stat Ende dat seste is dat conincrike van arabien, vanden welken coninc was een vanden drien coninghen, die onsen heere offerande gauen, doe hi gheboren was opten dertiendach.

[fol. 18ra]

Ende vele ander lande hout hi onder sine macht ende daertoe so is hi caliphes, dat een herde groet dinc is. Soudaen is te segghen in haren spraken coninc ende het plaghen te sijn vijf soudanen, mer nv en esser niet meer dan een, dat is die soudaen van egypten.