Refereynen ende liedekens

§ Refereyn 65.

Bruessel.
Uan Ioncx beghinnen.

DIE Uraghe die ghylien begheert te weten,
Suldy hooren, en alle Constenaers mede,
En alle die ghene die hier zijn gheseten,
Welck dat de Landen meest houden can in Urede,
Eenen Godt te dienen, verstaet die Sede,
Al eest dat ons den Uyant heeft ghebeten,
En schier verslonden met sijnen tanden:

[fol. 146v]

 

Want hy teghen de Menschen maect menighen tier,

 

Daer deur compt den Onvré in alle Landen:

 

Wou hem de Mensche noch beteren schier,

 

Godt te dienen met een vast Gheloof en fier,

 

En laten alle Tweedrachticheyt varen,

 

D'een niet beter zijnde dan d'andere alhier,

 

Want Godt is de ghene die ons noch wilt sparen,

 

Laet ons hem al tsamen met vierighe Bede

 

Bidden, dat de Onghelouighe verharen:

 

Want deur een vast Ghelooue blijft t'Lant in Urede.

 

 

 

Augustinus, Hieronymus leeren ons claer,

 

Met Redene, willet doch wel verstaen,

 

Dat de Węrelt teghen t'Gheloof is openbaer:

 

Maer sy moghen noch wel haer ooghen opslaen,

 

En gheloouen dat Christus is verresen,

 

En heeft ons met sijnen roode Bloede ghecocht,

 

Ghelijck ons Schriftuere heeft bewesen

 

Met een vast Gheloof, soo suldy salich worden.

 

De Kinders van Israel deurt root Meir ghebrocht

 

Pharao met sijn Heyr isser nae ghetorden,

 

Maer sijn Ongheloof en mocht hem niet verschoonen,

 

Wat heeft Godt noch al Miraclen willen thoonen,

 

Om dat de Mensche niet wanhopich sou wesen,

 

Hy heeft om ons willen bidden en lesen,

 

Om datse hier, en op een ander stede,

 

T'Gheloof verbreyden souden, verstat te desen,

 

Want deur een vast Ghelooue blijft t'Lant in Urede.

 

 

 

Al valdy, als Petrus dickwils heeft ghedaen,

 

Staet op, en gheloouen alleen Christum aen,

[fol. 147r]

 

En dincken dat hy selue Gode ende Mensch es,

 

Uwen Naesten leert, wilt loopen maer niet gaen,

 

Opden wech alsins lieuer hondert dan zes,

 

Al die Węrelt deure wilt ghy verbreyen saen,

 

Alsoo d'Apostelen tself hebben gaen preken,

 

Dwelck die Tyrannen hebben willen wreken,

 

En zijn van haer veracht gheweest, en versteken,

 

Dwelck noch sal Wraeck roepen ten eewighen daghen,

 

Als Godt sijn rechtveerdich Oordeel sal houwen,

 

Dan sal d'Ongheloouighe wel moghen claghen,

 

Sulck Menschen sullen dan gansch verflouwen,

 

Wee dan den ghenen die hen hebben misdraghen,

 

D'Ongheloof is heel verbreyt, verstaet mijn reden,

 

Leeft toch al tesamen wel, tsal Godt behaghen,

 

Want deur een vast Ghelooue blijft t'Lant in Ureden.

§ Prince.

Willet t'Ghelooue doch helpen verstercken,

In spijt die daer teghen willen, tsal v baten,
T'Woordt Godts wilt hooren, tzij leecken oft clercken,
Wilter v toe spoen, en des niet laten,
En malcanderen leeren, en daer nae hercken,
Op dat ghy meucht keeren, als Paulus heeft ghedaen,
Soo menghdy v inde Godheyt gaen vermeyen:
Doet uwen Uriendt ghelijck ghy woudt datmen v dé,
In allen vlecken waer ghy meught doen vermaen,
T'Gheloof des Heeren dat sal v leyen,
En daer nae bringhen in sijnen Hemelschen Uré.
Hier hebdy ghehoort nae mijn ionck vermoghen,
Dat ick nae Conste haecke om v lien Uraghe
Te solueren, al heuet niet veel ghedoghen,

[fol. 147v]

 

Nochtans beminn'ick de Conste als d'Ouders deden,

 

En wil beghinnen van mijne ioncxsten daghe,

 

Want deur een vast Ghelooue blijft t'Lant in Ureden.

§ Liedeken op de wijse,
Het voer een Ruyter in een bosschaeije.

EDel Mensche en wilt Godt niet verlaten,
Maer wilt hem dienen met Sinnen vroet,
Soo sult v aen v Siele baten,
Hy heeft ons gheschoncken sijn dierbaer Bloet.

Ghy Onverstandighe, wilt hier nae haken,

Om Godts Woort te hooren met Sinnen coen,
Soo suldy inder Liefden blaken,
Met salighe Spijse sal hy v voen.

D'Woordt des heeren dé Paulus keeren,

Hy vraechde, Heere, wat wil ick doen?
Inde Stadt van Damasco sonder eenich verseeren,
Creech hy Ghenade, en was van Sonden moen.

Wy zijn maer Eerde, wat willen wy maken?

Ons leuen en sal hier niet langhe zijn,
Ongheloouicheyt moeten wy staken,
Oft tsalder al qualijck gaen, verstaghet mijn.

Het Woordt des Heeren dat sal v leyen,

Inden Throon des Heeren, willet wel verstaen,
Die Węrelt deure willet verbreyen,
Soo suldy eewelijck in Rusten staen.

Wel hem de ghene die hier op dincken,

En die eenen anderen bekeeren can,

[fol. 148r]

 

T'Rijcke des Heeren sal hy hem schincken,

 

Want hy staghet in Godts Gracie dan.

 

 

 

Den Propheet Daniel (ghy moghet wel weten)

 

Heeft certeyn drye daghen lanck

 

Inden Cuyl der Leeuwen gheseten,

 

Dat Lichaem was wel alsoo cranck.

§ Prince.

Edel Prince, wilt de Const beminnen,

Maer Godt niet verlaten met alder Deucht,
Om Godt te dienen wilt van Ioncx beghinnen,
Hier met neemt danckelijc voor Ieucht sticht vreucht.