Refereynen ende liedekens

[fol. 60v]

§ Refereyn 27.

Den derden Prijs.
Tshertoghenbossche.
In viericheyt groeyende.
Waer S.D. Waerheyt. Cassyere.

WAer deur heuet d'Onruste plaetse ghenomen,
En dat ons de moeyte is ghecomen aen boort,
Dan deur d'Onwijsheyt Adams vol onvromen
Daer wy onghehoorsame al toe zijn comen,
Die alle Landen oock noch daghelijckx verstoort:
Dus eest recht dat wy den Heere, soot behoort,
Altijt bidden met vierighen Ghebede,
Dat hy sijn Wijsheyt (crachtich gaende voort)
In de herten der Princen recht bestede,
In ts'Landts Regenten, ghelijck hy oock dede
In Salomon, die sulckx voor d'alder beste Goet
Aensach, waer deur hy sijn Landtschappen in Urede
Behielt, soo ons ghetuycht de Schriftuere soet.
Dus en weet ick dan op dees Uraghe vroet,
Gheen beter Solutie, dan dese euen,
Dat dit de Landen altijt in Rusten behoet,
Der Regenten Wijsheyt hun van Godt ghegheuen.

Der Regenten Wijsheyt, die ick moet ghelijcken

By t'roer vanden schepe, daer t'gemeyn volck in vaert
Waer deur de Stierman (als daer aan comen strijcken
Onrustighe baren, t'discoordich blijcken)
T'Schip onderhoudt, dat het blijft onbeswaert:
Want gheen Landtschap hoe sterck oft hooghe vermaert
(Oft het schoon goey Wetten en Policijen

[fol. 61r]

 

Heeft, oock cloecke Inwoonders zeer oudt belaert)

 

En mach hier sonder in gheen Ruste bedijen,

 

Der Regenten Wijsheyt moet aen alle sijen,

 

D'eerste, de leste zijn, die toe siet en waeckt,

 

Waer in haer met Recht wel meughen verblijen

 

Alle goey Ondersaten, seydt die Waerheyt naeckt,

 

En wie sulcx wederstaet, wederstaet en versaeckt

 

Godts Ordonantie, ons voor gheschreuen,

 

Dus houdt dit de Landen in Rusten onghelaeckt,

 

Der Regenten Wijsheyt hun van Godt ghegheuen.

 

 

 

Deursiet den Bybel, Israels Regiment,

 

Alle Cronijcken, Historien ghepresen,

 

Als hem Crijch, Opruer, deur Onverstant blent,

 

Twist, Tweedracht, tot verderuinghe ghewent,

 

Uerbreyde, en d'Onruste voort quam, midts desen,

 

Oft sulcke quetsueren anders zijn ghenesen

 

Dan deur dees Wijsheyt der Regenten reyn,

 

Neen sy, daerom moeten sy gheluckich wesen

 

(De Landen meyn ick) die dat soo hebben certeyn,

 

En daer sulckx faelgeert, en is de plaghe niet cleyn:

 

Maer is een Teecken dat de Heere almachtich,

 

Sijn Roede seyndt ouer sulck volck ghemeyn,

 

Als hy dede in Dauids tijden crachtich,

 

Ghy Onuerstandighe dit soudy indachtich

 

Aensien, met een gehoorsaem Godtvruchtich leuen,

 

T'is claer, dit houdt de Landen in Rusten sachtich

 

Der Regenten Wijsheyt, hun van Godt ghegheuen.

§ Prince.

Den oppersten Regent Prince eerweerdich,

Dats Christus, daer Godts eewige Wijsheyt in rust,

[fol. 61v]

 

Thoont dat dit waer is, want hy als Heer rechtveerdich

 

En den rechten Iosue, sijn volck volherdich,

 

Hier deur tot de salighe Ruste met lust,

 

Ghebrocht heeft, dus alle ghy Regenten sust

 

Uoor desen, en in al gheeft hem de Eere saen,

 

Ghy Landen en toeft niet, denckt dese heeft gheblust

 

Den thoren die ouer v sou hebben ghegaen,

 

Sonder Gods Wijsheyt moghen geen Regenten staen,

 

Noch Landen gheregeert worden nae Godts beuel,

 

Daer om hoort, en volght der Schriftueren vermaen,

 

Bemint de Wijsheyt, eert des Ouerheyts opstel,

 

Schoudt allen Onrust, en tweedrachtich ghequel,

 

Den wech die tot Urede streckt gaet niet beneuen,

 

Siet, dit houdt de Landen altijt in Rusten wel,

 

Der Regenten Wijsheyt hun van Godt ghegheuen,

§ Een nieu Liedeken op de wijse,
Lustighe Ionghers wilt veriolijsen.

IN des Heeren name wilt nu vergaren,
Nae Godts verclaren // ghy dochters Sion al,
Grijpt aen den Psalter van thien Snaren,
Droefheyt laet varen // met een vrolijck gheschal,
Singt hem een Nieu liet, hier in dit eerdtsche dal,
De Heer verheuen,
Die ons heeft ghegheuen,
Sijn Ghenade, die eewich dueren sal. Singt. etc.

Dats Christus voorwaer // merckt ghy edel sinnen,

Dauid vol minnen // die Goliath seer fel,
Den helshen Tyran nijdich in d'beghinnen,
Hier quam verwinnen // deur t'godlijck voorrstel,
D'welck ghy ghesien hebt Kinders in Israel,

[fol. 62r]

 

Dies ghy met eeren,

 

Sijnen Lof vermeeren

 

Sult, en altijt sijn Goetheyt prijsen wel.

 

 

 

Hy eest alleene, niemant sijns ghelijcke,

 

Die Erm en Rijcke // deur sijn Ghenadicheyt,

 

In allen nooden by (dits autentijcke)

 

Staen, sonder swijcke // wil soo hy selue seyt,

 

Hier om van ganscher herten v rustich bereyt,

 

In sijns Wets weghen,

 

Gaet hem vrylijck teghen,

 

Looft sijn goey Daden soo heerlijck wt ghebreyt.

 

 

 

Al hebt ghy lichtveerdich zeer onbesneden,

 

Onlanckx gheleden // bedreuen boose daet,

 

Wil daer om wanhopich niet aftreden,

 

Den Pat des Ureden // voor v noch open staet,

 

En alle die nemen op hem haer Toeuerlaet,

 

Soo metten Uromen,

 

Totten Heere comen,

 

Met berou van Sonden, nae der Schriftueren raet.

 

 

 

Want siet, aen hen heeft hy een goet behaghen,

 

Die t'allen daghen // oprecht van herten zijn,

 

In vreese haers Godts na sijn Gheboden vraghen,

 

Swerelts toedraghen // met haren valschen schijn,

 

Altijt versmaden, dus siet met moede fijn,

 

Uast op dees dinghen,

 

Soo sult ghy voortbringhen,

 

Uruchten des Leuens // tot elcken termijn,

 

 

 

Al sijn Beloften sal hy v sterck houwen,

 

Wilt daer op bouwen // vast deur t'gheloouich werck,

[fol. 62v]

 

Salich zijnse die soo in hem betrouwen,

 

Liefde ontvouwen // hier in des werelts perck,

 

Hierom ghestadich neemt op Gods woordt gemerck

 

Teghen ts'Uleeschs lusten:

 

Wilt daer vry op rusten,

 

Soo sult ghy verwinnen // al metter deuchden sterck.

 

 

 

Ghelijck den Appel van sijnder ooghen

 

Sal hy voor dooghen // v wel bewaren reyn,

 

Hier om en vreest dan gheen Nijdts bethooghen:

 

Maer met verhooghen // lijdt sulckx vry ghemeyn,

 

Blijft vast by hem, als hy by v certeyn,

 

Soo sult ghy eruen

 

Uol soeter conseruen,

 

T'Rijck Godts met Christo, dat alderbeste greyn.

§ Prince.

Prince, dit Liedeken zeer slecht van prijse,

Laet met sijn wijse // v toch ghelieuen hier,
OFt Sauls gheesten, noch eens docht een spijse,
Die nae de Ghijse // Dauids wat smaeckte schier,
Hier me beuolen den oppersten Princier,
Die v volleestich
T'Corenbloemken gheestich,
Sijns Woordts laet plucken, als Heere goedertier.