Refereynen ende liedekens
(1563)–Anoniem Refereynen ende liedekens–
AuteursrechtvrijAntwerpen.
| |
[Folio 32r]
| |
Ouer d'Ongheloouighe Generatien,
Ouer welck Gods Gramschap neempt dominantien,
In dat Lant ende volck die d'woort Gods verfoeyen,
Waer af den Heere ons doet groot vermaen,
Tot onser Leeringen en confirmatien,
Op dat wy in Sonden niet en blijuen staen,
Want voorwaer gheen Ruste en sal ghebeuren aen
D'Lant oft volck die teghen t'Gebot zijn gheresen,
Uan Godt den Heere wy meughen ontfaen
Ruste inden Landen, en worden ghenesen
Uan Onrust en Catijuicheyt mits desen
Can men Landen houden in Rusten en voorspoet,
Gehoorsaem wesen dwoort Gods met Gelooue goet.
Ghehoorsaemheyt en Gheloouen eendrachtich,
Aen d'Woort Godts can in Rusten houden crachtich,
De Landen deur de Beloofte des Heeren,
Daer sulcx is, en salmen niet wesen clachtich,
Maer in Weluaren altijt vermeeren,
Ia, is saecke dat sy heur Herten keeren
Om te hooren d'Woort Godts d'welck is almachtich,
Oock bewaren Godts Gheboden tot alder tijt,
Dan sullen sy wesen sijn Liefste vol eeren,
Ende heur Uruchten sullen zijn ghebenedijt,
Oock allen tghene dat groeyt opder Eerden wijt,
Godt salt vermenichfuldighen zeer loffbaer,
Oock sullen vlien de Uyanden in den Strijt,
En in die Stede sal Ruste wesen aldaer,
Men in God ghelooft, doende sijn Wille claer,
Sulckx can houden de Landen in Rusten zeer vroet
Gehoorsaem wesen dwoort Gods met Gelooue goet.
| |
[Folio 32v]
| |
§ Prince.Uerstaet om smenschen salich wesen al ghemeyn
Uan tvoorschreuen gehoorsaemheyt aen Gods woort reyn,
Om Ruste in den Landen te houwen,
Is Godt lief hebben bouen alle certeyn,
En sijnen Naesten in allen benouwen,
Bijstant zijnde, doende sonder verflouwen,
Godts Gheboden houdende, tzij groot oft cleyn,
Uoor al soeckende t'Rijck Godts zeer excelent,
En sijn Rechtueerdicheyt, sonder vercouwen,
Met een leuende Ghelooue zeer diligent,
Wat meer van noode is sal daer zijn present:
Want sulcx doende can men Godt behaghen,
Die dan de Ruste belooft heeft onder t'Firmament,
Ende te beschermen van allen plaghen,
Soo can dit houden (naer des Princen vraghen)
Rusten inden Landen die elck verblijen doet,
Gehoorsaem wesen d'woort Gods met Geloue goet.
| |
☞ Een Liedeken op de wijse, Ghepeys ghy doet my treuren nacht ende dach.O Godt, wilt Wijsheyt gheuen,
Deur uwe Ghenaden goet,
Op dat wy moghen leuen
Naer uwen Ghebode soet,
Want wy zijn zeer onvroet,
De Doot die doet ons beuen,
Het sondich aencleuen
Maeckt ons soo crancken Moet.
Het Uleesch dat volght de Sonden,
Teghen des Heeren Beuel:
| |
[Folio 33r]
| |
Want het is quaet van gronden,
Den Gheest altijt rebel,
Daer toe wel al soo fel,
Onrust heuet ontbonden
Nu en tot allen stonden,
Elas, ick proeft soo wel.
De Werelt bringt erreuren,
Daer toe ons ooghe verblint,
Om hem te bekeuren,
Sulckx is sijn bewint,
Die hem zeer bemint
Ende daer naer speuren,
In d'ende sal hy treuren,
Als een des Werelts Kint.
De Uyant vander Hellen
Is ons altijt ontrent,
Hy compt ons altijt quellen,
De Sonden in t'herte prent:
Och Heere zeer excelent,
Met druck moet ick vertellen,
Hy wilt ons neder vellen
In t'Helsche logement.
O Godt staet ons in staden
Als wy zijn in den Strijt,
Want wy zijn zeer beladen
O Godt ghebenedijt,
Den Uyant ons benijt,
Hy wilt ons hier verraden,
Bewijst ons de Paden
Om te zijn van hem bevrijt.
| |
[Folio 33v]
| |
O Godt, doet ons bevroeyen
Uwe Ghenade groot,
En ons Ghelooue groeyen
In uwe Woorden bloot,
Gheeft ons der Sielen Broot,
Tot Deuchden altijt spoeyen,
Ende het quaet verfoeyen,
Helpt ons wt allen noot.
O Godt, wilt ons verstercken
Met uwen Gheest reyn,
Deur hem meughen wy wercken
Uwen Willen al ghemeyn:
Wy roepen groot en cleyn,
Wilt ons Cranckheyt anmercken,
Bewaert onder v vlercken
Die in v hopen certeyn.
| |
§ Prince.Goddelijcke Princieren,
Ghy gheeft ons goeden Raet
Dat wy van ons stieren
Allen des Uyants quaet,
Dan sullen vlien sijn daet
Deur v goedertieren,
Wilt ons Hope vercieren,
En ons te hulpe staet.
|
|