Refereynen ende liedekens

§ Refereyn 9.

Rosendael.
Springhende leertmen den Sprong.

§ Naer dien ons God, wt den schat sijnder Genaden,
Door sijnen heylighen Naem, den Peys heeft verleent,
So dat de Landen nu zijn ontladen
Uan des boosen Mars tyrannighe Daden,
Mits dat der Princen herten nu zijn vereent
In eendrachtighe Liefde, waer door de Ghemeent
In voorspoet is rijsende bouen schreuen,
Die eertijts door Ghewelt van Oorloogh was vercleent,
Sietmen nu door den Peys in Rusten leuen,
Welcke Ruste de Landen sal aencleuen,
So verd' Eendrachticheyt daer werd onderhouwen
Met een vast Gheloof, door s'heylichs Geests ingeuen,
En dat elck een sijn vocaci sonder flouwen,
Ghenoch doe: niet soekende ter goeder trouwen,
Dan der Landen orboir, welck in Rusten vaillant
Blijuen, mits t'vseren (so elck mach aenschouwen)
Der eendrachtigher Liefden, door t'Geloof gheplant.

Uoorwaer den Landen moet ouerwel lusten,

Daermen Eenicheyt des Gheests siet obserueren,
So dat de Ondersaten hen toe rusten
Metten Bandt des Ouerheyt heur subiugeren,
De welcke sijn Ghemeente can gouuerneren
Als een wijs Herder, die sijn Schaepkens bemint,

[fol. 20v]

 

Nemende goet Regard sonder cesseren,

 

dat hem niemant sijnder coyen en onderwint,

 

Dan door de Deur in te gaen, op dat ongheschint

 

Sijne Schaepkens moghen blijuen eenpaerlijck

 

In Eenicheyt des Gheloofs, vreedsamich ghesint,

 

Elck eenen behulpsaem, niemanden beswaerlijck,

 

Wil hem elck dus draghen, so sullen ghewaerlijck

 

Onderhouden werden, de Landen triumphant

 

In Rusten, door t'ghebruyck (so elcken is claerlijck)

 

Der eendrachtigher Liefden, door t'Geloof gheplant.

 

 

 

T'Gheloof is een Gaue der Godlijcker ader,

 

Waer door de Menschen tot Godts kennis gheraken,

 

Door Godts kennis, daelt in de Menschen te gader,

 

Soonlijcke Ureese, so dat sy Godt den Uader

 

Als Kinders ghehoorsaem zijn in alle saken,

 

Door Ureese des Heeren, sietmen heur ghenaken

 

T'beghin der Wijsheyt, welck is den wech bekent,

 

Om van d'een Deucht in dander den ganck te maken,

 

Principael totter Liefden, welck is t'Fundament

 

Der Eendrachticheyt: want door obedient

 

Blijuen, alle goetwillighe Ondersaten

 

Den ghenen die ouer haer hebben t'Regiment,

 

En haer draghen, als beminde Potestaten,

 

Daer hem elck dus vuecht in alle Staten,

 

Canmen wel in Rusten de Landen playsant

 

Onderhouden, mits d'Accoort (wilt dit wel vaten)

 

Der eendrachtigher Liefden, door t'Geloof gheplant.

§ Prince.

Siet, hoe soet en ghenuechlijck eest om woonen

In de Uergaderinghe Iesu Christy

[fol. 21r]

 

In een Accoort des Gheloofs, niet om verschoonen,

 

Daer de Broeders d'een d'ander bethoonen

 

Eendrachtighe Liefde, van allen twist vry,

 

Sulckx dat d'een d'ander blijft so vast ghespist by

 

Als eenen muer, gheweldich van Fundatien,

 

Teghens welcken te vergheefs alle list zy,

 

Diemen hem aendoen mach, t'eenigher spatien,

 

Aenmerckt dit tsamen ghy Princen en Natien,

 

Die v Landen in Rusten te houden begheert,

 

Hebt Eendracht der Liefden in estimatien,

 

Op dat v, uwe Ghemeente heb lief en weert,

 

Soo doende, suldy werdden der Consten expeert,

 

Om v Landen t'onderhouden aen elcken cant

 

In Rusten, door den Bant (soo voren is vercleert)

 

Der eendrachtigher Liefden, door t'Geloof gheplant.

§ Een Liedeken op de wijse, Een Meysken vander Heyden. &c.

UErheucht v edel Geesten,
Die hier tot deser Feesten
Wt Ionsten zijt vergaert,
Wilt minsten, metten meesten,
Nu alle Ureucht volleesten,
En toocht Rhetorices aert,
Door d'ionstich compareren,
Wilt constich exerceren
Dees Const zeer hooch vermaert.

En wilt niet afwijcken

Der constigher practijcken,
Die Athlas neue vant,

[fol. 21v]

 

Dats d'Edel Rhethorijcken,

 

Welck dient byder Musijcken

 

Zeer wel, by reden want,

 

Waer dees twee domineren,

 

Daer sietmen triumpheren

 

Elckx ionghe Ieucht playsant.

 

 

 

Dees Consten twee laudabel,

 

Wiens Deucht inestimabel

 

Te bouen gaet het Gout,

 

Niemanden molestabel,

 

Maer elcken profitabel

 

Zijn sy zeer menichfout,

 

Elck hoortse gheern vseren:

 

Want sy elck inciteren

 

Tot Ureuchden Iong en Out.

 

 

 

Maer Rhetorijck bysonder,

 

Die Godts Secreten wonder

 

Den Menschen leert zeer net,

 

Sy is s'Woordt Godts doorgronder,

 

Die Boosheyt brengtse t'onder

 

Met rijpen Raet beset,

 

Al door haer diuiseren,

 

Can sy Tweedracht payseren,

 

D'welck een quaey Tong belet.

 

 

 

Door haer, Ambassadeuren,

 

En alle Orateuren

 

Zijn hooghelijck gheacht,

 

Alle quaey Erreuren

 

Can sy snel controleuren

 

Met Sinnen wijs bedacht:

[fol. 22r]

 

De Landen prospereren

 

Daermen haer siet regeren,

 

Mits haer Wel spreken sacht

 

 

 

Allen Melancolyen

 

Doet Musica verthyen,

 

Door haer Proporci ient,

 

Mits haerder Melodyen

 

Uerdrijft sy Fantasyen

 

Crachtich en vehement,

 

Orpheus moduleren

 

De Dierkens die gauderen

 

Al door sijn Instrument.

 

 

 

Alle treurich knaghen

 

Musijck sonder versaghen,

 

Den Mensch verweruen // doet,

 

Sauls boose vlaghen

 

Sachmen saen vertraghen,

 

Aldoor t'verscherpen // vroet:

 

Als Dauid ghing hanteren

 

Om Sauls recreeren

 

Het Spel der Herpen // soet.

 

 

 

Princier zeer fier verheuen,

 

Dees Consten wilt aencleuen,

 

Waer door elck Ieucht sticht Ureucht:

 

Een Goddelijck leuen

 

Werdt v daer deur ghegheuen,

 

Dies ghy verheucht zijn meucht,

 

Waer dees twee resideren,

 

Daer sietmen extolleren

 

Peys, en volmaeckte Deucht.