Refereynen ende liedekens


§ Totten Leser int ghemeene. EErbare, notable Lesers ghemeene, Die de Conste van Rhetorica beminnen, Wilt dees Refereynen en Liedekens reene Toch lesen, als Uerstandighe sinnen, Ghy sulter (hopen wy) voeytsel by ghewinnen, En wilt toch voor al, nae den Urede staen, Soeckende Wijsheyt in al v beghinnen: Weest haer subject, en volght allen haer vermaen,
[Folio A6r]
Als Leden ws Hoofts, en wiltse niet afgaen: Wijsheyt leert elcken int sijne zijn te vreden, Want t'is Sotheyt hem yet te moeyene saen, Dat hem niet aen en gaet onbesneden: Wijsheyt leert t'quaet vreesen in allen Steden, En doceert de Liefde, den oprechtighen Bant, Sij houdt de Landen (deur haer minlijcke Seden) In goeder Rusten: want Urede triumphant, Die is by haer houdende de Ouerhant, In alder Ureuchden, en Deuchden vermaerlijck, D'welck v dese Refereynen met verstant Int breede sullen verhalen claerlijck, En oft sy v somtijts vielen wat swaerlijck, Soo meughdy uwen Gheest met Sanghe verblijden In dees Liedekens van sinne eerbaerlijck, Sy sullen v Swaermoedicheyt doen mijden, T'Corenbloemken wenscht v d'eewich bevrijden Goetwillighe Lesers, beminde vroede, leeft hier inne, en nemet voor t'Goede.