|
| |
| |
| |
Prologhe.
§Aen de Eerweerdighe Heeren // heerlijck,
Heer Ian van Locquenghien, Ridder vaillant,
Heere van Cockelberghen vol eeren // eerlijck,
Heere van Berchen, Amptman discreet en plaisant.
Heer Adriaen Tay, wijs en elegant,
Heere van Wemmele, eerlijck verheuen,
Borghemeesteren, Schepenen, cloeck int verstant.
Rentmeesteren ende Raedt daer beneuen,
Der Princelijcker Stadt (heerlijck beseuen)
Van Bruessele, wenscht t'Corenbloemken able,
Salicheyt, Welvaren, en Vrede laudable.
Soo kenlijck is, dat alle Consten lofsame
Hebben haer besundere Cracht en Uirtuyt,
Als toecomende dinghen bequame
Te bewijsene, en den Menschen ouerluyt,
Te vermakene, oft met goet besluyt
Te ghenesene: tschelijckx eest waerachtich
Dat Rhetorica, ts'Menschen sinnen ruyt
Is instruerende tot Deucht eendrachtich,
| |
| |
Zijnde een Conste van Welspreken machtich,
Te wetene, Gheschickte woorden eloquent,
Die ts'Menschen Herte beweghen sachtich
Tot Pays en Urede, Oock houden diligent
In goeder Rusten, deur Wijsheyt excellent,
Ghelijckt ghebleken heeft aen d'Edel Romeynen,
Ualerius, Cicero bethooghen jent
Hoe dat (doen t'Uolck in de Roomsche pleynen
Oproerich wilden werden om Deuchts vercleynen)
Sy hieldent teghen met Woorden vol Wijsheden,
En costen soo best t'grousaem bedrijf ghereynen,
Stellende den grammen Moet in Ureden,
En hielden Ruste met goeder Seden:
Ende want veel Menschen haest zijn gheneghen
Tot Tweedrachticheyt, erreurich besneden,
Soo heuet t'Corenbloemken vercreghen,
Rhetorijckelijcken (nae d'oude pleghen)
Te vraghene, Wat dat de Landen can houwen
In Rusten? totter Salicheyt beweghen,
En dat om dat de ghene die Twist voortstouwen,
Uraghende, souden mogen aenschouwen,
En bepeysen in hun seluen d'Ellendich quaet,
Hoe Twist en Erreur can de Werelt benouwen,
Want t'ghene datmen ruert, men meest gade slaet,
En oock om dat de goede Slechte delicaet
Souden meughen haer weten te wachtene,
Schouwende sulcke Twistmakers obstinaet,
Daer heden sdaeghs wel op is te achtene:
Want t'is d'Oncruyts natuere, te versmachtene
Het goede Cruyt, lietment gheworden voorwaer.
| |
| |
Uoort, om goede Ureucht te verpachtene,
En te verghetene Melancolye swaer,
Uerheughende den Gheest met Sanghe claer,
Soo begheerde t'Corenbloemken by tselfde werck,
Oock Liedekens recreatijf en eerbaer,
Die de crancke Ledekens, bedruckt int bemerck,
Meughen conforteren, en maken sterck,
Op den welcken veel Rhetoricienen goet
Hebben ghepresenteert int Bruesselsche perck,
Haer constighe Acten, van Sinnen vroet,
Elck nae sijn Opinie, soluerende soet
Ts'Corenbloemkens Uraghe oirboorlijcke,
By een nu ghestelt (deur der Minnen vloet)
In desen Boeck, by Ordens authentijcke,
D'welck v Eeweerdighe Heeren publijcke,
T'uwer Eeren (wt Liefden) wordt ghepresenteert,
Uan t'Corenbloemken: want in elcken wijcke,
Uwer Eerweerdicheyt (ghenatureert
Wt ingheborender Natueren ghelaudeert)
Heeft altijt tot Eendrachticheyt ghemeene
Zeer neerstich gheweest, en Wijsheyt gheuseert,
Waer mede ghy v Ghemeynte groot en cleene,
Hebt gheduerich ghehouden in Rusten reene
Met grooter Uoorsichticheyt, om elcx verschoonen,
Hun niet ghesaelgeert, in Druck oft Weene,
D'welck men v noch daghelijcx siet bethoonen
Metten wercken ende daet, weerdt om croonen:
Want allen v Acten totten Urede strecken,
Met toegheneychden moede (vrij sonder hoonen)
Ghemedtsaem onder t'Uolck in allen plecken,
By de Ghemeynte doedy Liefde verwecken,
| |
| |
Dus eest kenlijck (om elcx verjubileren)
Dat allen v affairen tot Urede trecken,
Om den welcken haer t'Corenbloemkens hanteren,
Altijd onderdanich moet offereren
Onder v Subiectie, goetwillich bereyt
T'uwen Dienste altijt, sonder varieren,
Ghehoorsaem wesende v Autoriteyt,
Biddende dat uwer Eerweerdicheyt
Belieuen wille, dese Refereynen al
En Liedekens (elck by de sijne gheleyt)
Te ontfanghene voor een Ghifte smal,
Uan den goetwillighen dienst (cleyn int ghetal)
Die v t'Corenbloemken is schuldich altijt
Te bewijsene, en eewichlijck doen sal:
Hier mede verleene v Godt ghebenedijt,
Salicheyt, Welvaren, wesende bevrijt,
Hier naemaels by Gode met goeder Deucht,
In de volcomen Ruste, daer IEVCHT
|
|
Auteursrechtvrij