Refereynen ghepronunchieert opte intreden binnen der stede van Delft

[fol. O2v]

Tot den afgunstighen ende goetdunckenden Lachteraers ofte Zoylisten.

Ghy Zoylisten die hier veel zijt bouen maten,
En van als t'end' wel weet eert beginnen // sal,
Sittende yewerts onder een leuff byder straten,
Of byde biercan, daer ghy weet te praten,
Wie dat den prijse deruen ofte winnen // sal,
Of wie tschoonste, en tbeste ghedicht versinnen // sal:
So weet ghy hier toe dan te segghen als botte draecken,
Een groot ghebreck ick in elcx werck wel vinnen // sal,
En wiens ghy haet, dien weet ghy t'zijn grootlicx te laecken,
Doch selffs hebdy de macht niet om beter te maecken:
Daerom moet dit v goetdunckende nv zijn verweten,
Want den gheleerden Homerus moest oock schemp smaecken
Van Zoylo, waer deur ghy Zoylisten werdt gheheeten:
Mer Ptolomëus den Coninck wijs in secreten,
Wilde dien Schemper in zijn daden niet stijuen,
Mer brocht haestich tot niet zijn spits wtmeten:
So dat hy voor den Coninck in schand moest blijuen:
Minder schande sal aen v nijdighe niet beclijuen,
Daer Constighe Gheesten van tspijtich schieten // crijghen,
T'wert v gheraden swijcht, en laet t'schimpen drijuen,
Verbetert, of schande sal v hieten // svvijghen.