Refereynen ghepronunchieert opte intreden binnen der stede van Delft

[fol. O1v]

Refereyn.

Ghelijck Helicon, en Parnassus vol deuchden // zijn,
Deur t'godlick versamen crachtich in wijshede:
Also waren wy Raepkens, nu, vol vreuchden // fijn,
Deur v, die Constlick ver-eerde Delft die Stede
Want ghy verscheent ons met een Heerlicke Intrede
T'welck voor tghemeen volck was een groote iubilatie.
So bedancken wy v dan, naer behoorlicke zede,
⁺Ghy VVijngaertrancxkens die tot deser spatie
Smaecte sdruyffs soeticheyt met recreatie.
⁺Wy bedancken v ghy Lelykens onder den dooren,
Om dat ghy ons Feest vermeerde sonder tardatie,
Ter eeren Rhetorica die bloom wtvercooren,
Want t'was VVt liefde bestaaen om dien druck te smooren,
Die ons ghebrocht had' in swaerder verseringhe:
Dies v constlicke compste ons deed' vreucht oorbooren,
Want niet dan Const, was ons Raepkens begheringhe.

⁺Tschiet vvt lieft dat wy v insghelijcx bedancken,
Ghy Blome van Ierico seer excelent,
Die v vertoonde als een van Rhetorices rancken.
⁺Wy bedancken v oock ghy VVitte Acoleykens ient,
Soot behoort, want mitsdien dat Lieft is t'fondament,
Waerdy om ons Feest te vermeeren ghecomen.
⁺En op dat voorts Mercurius gheslacht werd' bekent,
So bedancken wy v mede ghy Corenblomen
Die Met Gheneuchten const oeffent als den vromen.
⁺Wy dancken d'Olyftaxkens daer niet an heeft ontbroecken,
Want T'spruyt vvt lieft dat by haer werd' voorghenomen.
⁺Wy bedancken oock de Roode Roosen wyt ontloecken,
Die ons door const aenbrochten veel lieflicke roecken,
Doch Ansiet de Ionckheyt die ons deed' dees ver-eeringhe,
Want niet dan Const was ons Raepkens begheringhe.

⁺Wy bedancken v Hofbloomkens lustich, wiens deuijs // is,
Volbrengt lieft, want ghy in dees contreyen,
Ons Feest vermeert hebt, nae v constich bewijs // is.
⁺Wy bedancken v mede ghy Blauvve Acoleyen,

+ Monster.

+ Noortvvijck.

+ Naeltvvijck.

+ Leyden.

+ Haghe.

+ Maeslandt

+ Schiedam

+ Lyer.

+ Rotterdam.

[fol. O2r]

 

Die Met minnen versaemt zijnde poocht minlick te scheyen,

 

Rustich' soot betaemt allen broeders der Rhetorijcken,

 

Doch bouen dien so hebdy om const te verbreyen,

 

Ons Feest vermeert deur v studieuse Pracktijcken:

 

⁺Wy bedencken den Dorren Boom oock van ghelijcken,

 

Die wt t'Iolijt vanden Dorren op dees tyen // vroet,

 

De Conste gheensins en begheerde te beswijcken,

 

Mer vermeerderde ons Feest deur sulck verblyen // soet,

 

Met all' d'ander, so dat elck mensch belyen // moet,

 

Dat wy in Parnassus Berch hadden ons logeringhe,

 

Deur dees const die elck een an allen syen // voet,

 

Want niet dan Const was ons Raepkens begheringhe.

 

 

 

Prince.

 

Prinschlicke Bloemen onsen Oorloff generale,

 

Dancklick ontfaet als Rhetorizienen verheuen,

 

Onderhout dees Const, wiens deucht principale,

 

De Philosophen en Orateurs hebben beschreuen:

 

Nochtans connen gheen menschen haer volprijsen die leuen,

 

Want daer sy plaets heeft, sal Inuidia wesen // niet,

 

Menighen haet en gramschap is eertijts verdreuen,

 

Met haer soet vloeyende Reden, so wy lesen // siet,

 

Discordia sietmen dat oock mitsdesen // vliet,

 

Deur haer schoone scientie en groote deucht:

 

En deur Prudentie sy als hoochghepresen // biet,

 

Dat hem elck tot Lieft, Vreed' en Eendracht veucht,

 

Daer volcomen Liefd' sal zijn en veriubileringhe,

 

⁺Dits nv de Vrucht der Consten waer in VVy Rapen Geneucht,

 

Want niet dan Const was ons Raepkens begheringhe.

VVy Rapen Gheneucht.

Per Helleman.

+ Geervliet.

+ Delft.