Refereynen ghepronunchieert opte intreden binnen der stede van Delft
(1581)–Anoniem Refereynen ghepronunchieert opte intreden binnen der stede van Delft–
Auteursrechtvrij
[Folio M3v]
| |
Refereyn op de Uraghe.Godt Almachtich Schepper seer hooch ghepresen
Die inden mensch blies een adem so men weet
En hem schaepten in heylicheyt nae twezen
Sijns persoons Genesis gheeft ons claer bescheet
Maer den mensch siende ghenade wtghespreet
Op hem int Paradijs cost hem daer nae niet voeghen
Maer door wangelooff hy inden appel beet
En door Duyuels liste worde hy bedroghen
So dat hen Godt beual d'aerde te ploeghen
En wt t'paradijs worden hy ghedreuen
Vanden Enghel doen ghinck den mensch hem poeghen
De aerde te bouwen en dat al zijn leuen
Doen heeft den mensch hem tot practica begheuen
Den een dit dander dat ick segt tallen stonden
Dat de Letter t'swaerste en t'beste is verheuen
Dat mach wesen oft gheweest heeft in swerelts ronden
Dat oyt door smenschen verstant is gheuonden.
Die Letter het swaerste tis goet wilt mercken
Want het is swaer om die selfde te verstaen
Want door die weet men alle constighe wercken
Schrifturen policy tis al door de letter ghedaen
Godts barmherticheyt door de letter wy schouwen aen
Maer het is swaer den grondt daer af te iugeren
Schriftuer doet ons daer af een goet vermaen
Van die Letter en t'sal met proffiteren
D'onuerstandighen wtleggher maer ruyneren
Den selfde want dickwils staet slaet gade
Dat het een teghen dander schijnt t'argueren
En dat daer ghewandelt worden verscheyde pade
Maer de letter als tswaerste bidt Godt om Rade
Die wel te verstaen off ghy wordt verslonden
Diese niet te recht verstaet sal Godt versmade
De letter t'swaerste is ick segt als den ghesonden
Dat oyt door smenschen verstandt is gheuonden.
| |
[Folio M4r]
| |
Die Letter het beste wilt hier op letten
Dat daer op eenighe tijt is ghevonden gheweest
Doer de Letter wy op Godt betrouwen setten
En door de letter ist so men perfectelick leest
Dat den mensch op Godt denckt en hem van herten vreest
Door de Letter is den Moriaen bekeert
En door den selfde crijchtmen een verstandighen gheest
Door de Letter wert Godts Kerck gheregeert
Door de Letter alle afgodery cesseert
En door den selfden wy op Godt betrouwen
Door de Letter ist dat Godts ghemeynte vermeert
Door de Letter wy zijn barmherticheyt aenschouwen
En ons salicheyt sien is dat wy op Godt bouwen
Door de Letter sietmen dat wy zijn verbonden
Aen onse schepper ist dat wy zijn woort houwen
De Letter t'best is so ick v gae verconden
Dat oyt door smenschen verstant is gheuonden.
Prince.
Prince dat de Letter tswaerste is en tbeste,
Machmen nu claerlick tallen tijden wel sien
Door de Letter alle rechten men siet veste
Door de Letter sietmen dat Godt sal verblien
Den goeden, en dat hy boosheyt sal wt wien
En haer bederuen so daer claerlicken staet
Die de Letter voldoet sal ghebenedien
Die de Letter misbruyckt is van Godt ghehaet
Door de Letter alle schriften voorcoemt dit aenvaet
Door t'lesen der Letteren wy ons onderwijsen
Door de Letter sietmen de Propheten haer raet
Wie mach den vinder van dien al te seer prijsen
Door de Letter alle leeringhe men siet rijsen
De Deuchde van de Letter machmen met monden
Niet wt spreecken, het herte doet veriolijsen
De Letter is t'swaerst en t'best wilt wel door gronden
Dat oyt door smenschen verstant is gheuonden.
Ansiet de Ionckheyt. |
|