Refereynen ghepronunchieert opte intreden binnen der stede van Delft
(1581)–Anoniem Refereynen ghepronunchieert opte intreden binnen der stede van Delft–
Auteursrechtvrij
[Folio M2v]
| |
Refereyn op de Uraghe.Twaerste ende beste in swerelts Ronden
Dat door smenschen verstant oyt is gheuonden
Sijn goede Politien Wetten ende Rechten
Wel verstaende dat den mensch besmet met sonden
Door zijn verstant alleen die niet vast can hechten
Maer Godt werckt door zijn Instrumenten als knechten
Dat wat goets (al ist difficijl) wert bedacht
Daerom somen toch teghen Godt niet moet vechten
Gheuen wy de meeste eer zijn Godtlicke macht
Dese wetten en rechten seer hooch gheacht
Moeten met Godts wet en woort niet discorderen
Daerop d'ouerheyt moet houden goede wacht
Dat heur statuyten Godts woordt niet repugneren
Sy moeten die oock selfs niet violeren
Om swerelts, Eer, Goet, of ghescheinck, dat menich becoort:
So sal tghemeen volck met ernst obedieren
Goede wetten ende rechten conform Godts woordt.
Hoe veel aen goede wetten is gheleghen
Moet men wel bedencken ende ouerweghen
Want voort smenschen verstandt ist een sware last
Hadmen eertijts sulcke Placcaten vercreghen
Met Godts woort wel beproeft en vereenicht vast
So hadmen Godt in zijn Regiment niet ghetast
Waer door zijnen toren ontsteeckt groulick en snel
Al is de meyninghe goet, hoemen daer op past
Tis een grouwel voor Godt, ist teghen zijn beuel
Veel veruolgers meenen oock somtijts te doen wel
En driuen Tarwe voor oncruyt wt de landen
Haer bloedighe wetten en Placcaten fel
Bewarent oncruyt, en doen tcoren verbranden
Al is haer meyninghe goet sy comen tot schanden
Want sy brenghen wetten teghen Godt (gheset voert)
Daerom ist swaerst en best bouen allen panden
Goede wetten ende rechten conform Godts woort.
| |
[Folio M3r]
| |
Alle Ouericheyt heeft een spieghel schoon
Aen Coninck Saul Godts ghesalfden die tot loon
Straffe vervloeckinghe voor seghen bequam
Hy dacht tis goet (als de vernuft is ghewoon)
Dat ick Godt offer tvetste van Os, Schaep en Ram.
Den Coninck Agagh hy oock tleuen niet benam
Die hem van Godts Propheet beuolen was te dooden
Al laet ick tvee leuen, Godt werdt daerom niet gram
Ick verschoon tbeste ende laet slachten de snoden
Dat docht hem goet, mer Godts Propheet had gheboden
Van d'Amalechyten (mensch noch vee te sparen)
Mer Saul is tot zijn goetduncken ghevloden
En laet de beste tot danck offer bewaren
Daer ouer hy so qualick is gheuaren
Dat hy gants wt zijn Coninckrijck is verstoort
Dus t'swaerste is, en tbest, dat menschen openbaren
Goede wetten ende rechten conform Godts woort.
Prince.
Ieroboam een Prince (wie sout niet laecken)
Beueelt twee gulden Calueren te maecken
Daer voort t'volck Afgoderye bedreuen
Rehabeam soude aen zijn svaders rijck raecken
Terstont wil hy tvolck onder swaerder last gheuen
Daerom most hy oock selfs vluchten ende beuen
Om dat hy met swaerder Iock dreychde so wreet
Den Paus veel Coninghen end' Princen verheuen
Hebben oock Placcaten en wetten ghesmeet
De welcke oock swaer zijn, mer niet goet somen weet
Die sy teghen ende buyten Godts wet dichten
Dauid een voorbeelt aller Ouerheyt verbreet
Oock de Iongheren Christi ons verlichten
Want so sy wetten ofte rechten stichten
Godts, raet ende haer ghebedt wert eerst ghehoort
So ist tswaertst en t'best voor smenschen ghesichten
Goede wetten ende rechten conform Godts woort.
Ansiet die Ionckheyt. |
|