Refereynen ghepronunchieert opte intreden binnen der stede van Delft
(1581)–Anoniem Refereynen ghepronunchieert opte intreden binnen der stede van Delft–
Auteursrechtvrij
[Folio L4v]
| |
Refereyn op den Reghel.Hoe leeft nu den mensche int swerelts foreest
Hoe heeft de boosheyt nu d'ouerhant ghenomen
Hoe soeckt men pracktijcke minst ende meest
Hoe loopt het volck nv met swaeren tempeest
Hoe ruysense nv om haer ziele te verdomen
Hoe verdrucktmen nv wel te rechte den vromen
Hoe gaet het met dese boose werelt nv toe
Hoe gaet den mensche voor malcanderen schromen
Ghelijck een kint dat gaet voor de roe
Den mensche is vol bedroch hy en wert niet moe
Tis al rappen schrappen hoe hijt best can crijghen
Loopt hem dan tfortuyn teghen hy wil zijn selfs verdoe
En die nae haer wille niet en doet moet dickwils swijghen
Dus moet den gherechtighen in alles prijghen
Ende voor den boosen seer dickmaels beuen
In grooten arbeyt moet hy swaerlick stijghen
Want Godt haet den menschen die booslick leuen.
| |
Een Liedeken.Godt die haet den mensche oock seer
Die hier in boosheyt leuen
Sijn plaghen nemen gheenen keer
Om dat wy ons in sonden begheuen
Gods gramschap niet en rust
Den doosen wil hy bederuen
Inder hellen pijne ongheblust
Sal den boosdader eewich steruen
Oorlooch pestilentie niet en sust
Des doots heerschapije moeten sy eruen.
Den mensche heeft veel exempelen voor ooghen
Die ouer veel duysent iaeren zijn gheschiet
Alleleens als die eerste werelt haer ginck pooghen
Ende die menschen malcanderen seer bedroghen
Twelcken haer brocht in swaren verdriet
So dat sy verstouen ghelijcken een riet
Ende in die Deluuie mosten sy versmooren
| |
[Folio M1r]
| |
So gaet het nu thoe diet wel te rechte doorsiet
Maer Godt beschermpt altijt zijn wtuercooren
Dus laet ons doch altijt nae Godts woort hooren
Ende niet slachten Pharo boos ende quaet
Die de kinderen Israhels meende te verstooren
Maer Godt die maeckte hem heel obstinaet
Hy vervolchde haer nae met grooten haet
Maer hy moste inde roode zee sweuen
Dus hy wel dwaes is die teghen den Heer opstaet
Want Godt haet den menschen die boosselick leuen.
Laten wy ons bekeeren reijn
Als die van Niniuen deden,
En als Dauid den Coninck pleijn
Manasses oock met vierighe beden
Petrus was seer beswaert
Als hy den Heere hadde versaket
Met weenen schreyen heeft hijt verclaert
Sijn ghebedt tot den Heere ghestaket
Den moordenaer was onueruaert
Godt heeft zijn ziele salich ghemaket.
Sodoma Gomorra was seer rijck van goeden
Die landen waren weelderich aen allen cant
In haer groote rijckdommen sy haest verwoeden
Ende verdruckten Loth met quaet vermoeden
Maer Godt zijn Engelen al tot hem sandt
Ende namen Loth en zijn huysghesin al met de hant
Voort liet Godt solffer en peck comen al met ghequel
Dus vergaet den boosen altijt met grooter schandt
Ende de Heere beschermt altijt den vroomen
Saul die liep oock seer naet verdoomen snel
Hy vervolchde Dauid maer ten mochte hem niet baten
Absolon jaechde oock sonder verschromen
Ende ghinck Dauid zijn eyghen Vader haten
Daerom hy seluer zijn leuen most laten
En bleef hanghen aen een Eycken daerse hem andreuen
Daer wert hy an deursteecken als een quaet verwaten
Want Godt haet den menschen die boosselick leuen.
Saulus was oock rassche bekeert
Als den Heere hem heeft ghesleghen
Doen hy mandamenten hadde begeert
Om daer boosheyt me gaen te pleghen
Mattheus haest vanden Tolop stont
Tvrouken in ouerspel beuonden
Christus sprack met een blijd' vermont
| |
[Folio M1v]
| |
Gaet henen vergheuen so zijn v sonden
Den Publicaen hoort dit oorcont
Is rechtvaerdich inden Tempel beuonden.
Prince.
O Princeliken Vorst die self vervolch most lijden
Van Iudas zijn eyghen Discipel die v selfs verriet
En van v eyghen volck Israhel tot allen tijden
Most ghy door cruys torment in alles strijden
Hoe wel dat ghyse van aerde ghemaeckt hadt siet
Sy songhen voorwaer mede dat harde liet
Cruyst hem cruyst hem twas haer begheeren groot
Laet los Barabam helpt Christum int verdriet
Dus waert ghy ons salichmaker in grooten noot
Ende sturft voor ons oock den smadighen doot
Maer door haer boosheyt quamen sy oock in pijnen
Moyses vielt oock swaer twas een seer grooten stoot
Dat Corach Dathan Abyram met den zijnen
Sy hebben Moyses oock te haten gaen schijnen
De Aerde dee haer oopen sy zijn ter hellen ghegheuen
Met al dat sy hadden ghinghen sy onderwaert d'wijnen
Want Godt haet den menschen die bosselick leuen.
Prince.
Prince die haer niet bekeert saen
Sullen die kinderen Israhel slachten
Die inder woestijnen zijn vergaen
Door die felle Serpenten met machten
Helias soonen seer stout
Die bleuen oock seer ras verslaghen
Antiochus den Coninck bout
Ghinghen die wormen fel doorcnagen
Tschiet wt iolijt vanden dorren menichfout
Schouwet de boosheyt sonder voor saghen.
|
|