Refereynen ghepronunchieert opte intreden binnen der stede van Delft
(1581)–Anoniem Refereynen ghepronunchieert opte intreden binnen der stede van Delft–
Auteursrechtvrij
[Folio L3r]
| |
Refereyn.So haest den mensch hadde ouerghetreden
Door onachtsaemheden, en eyghen verstant
Tghebodt des Heeren, is hy besteden
Vande handt Gods in zijn eyghen leden
Waer door hy met reden bekende zijn schandt
Welcke ouertredinghe wy tot een doodtlick pandt
Als metter handt, van ons voorouders hebben gheerft
En so wijt ghebruycken soot in ons is gheplant
Godt haet ons want die sondicht diens ziel die sterft
Naedien hy viandt alder sonden is, dien hy bederft
En haer van hem kerft diese beminnen
So laetse ons verwerpen, eer elck verwerft
Die in sonden swerft, die doot in hem binnen
Want die Godtloose sullen vergaen en niet ontrinnen
Godts oordeel, maer beginnen, daer voor te beuen
Dus bekeert v in tijts wilt v vleysch verwinnen
Want Godt haet den menschen die booslick leuen.
| |
Een Liedeken.O Werelt verkeert, O menschen verblint
Met boosheyt besmet, aen allen zijden
Die Godts woort onteert, die loghen bemint
Ouertreet die Wet, tot allen tijden
Wat meent ghy, dattet Godt sal lijden
Sonder castijden, voor of naer?
O neen, dats claer // want hy haet haer
Die sonder vaer // sondighen swaer
En salse plaghen:
Dus metter spoet // het nieu aendoet
Doet rechte boet // sulck een ghemoet
Sal Godt behaghen.
Godt is almachtich die den boosdoender haet
So ons Esaias verslaet, dus wilt hem vreesen
Dewijle ghy mijn verlaeten hebt door v quaet
Wil ick v oock verlaeten, Spreeckt God, dit wel verstaet
Als ghy roept om baet, wil ick v niet ghenesen
| |
[Folio L3v]
| |
De ruijne der werelt quam door desen
Maer wat haet dit mach wesen, staet wel te bemercken
Daer Godts barmherticheyt niet zy ghepresen
Daermen zijn heyl wtghelesen, in hem niet laet wercken
Daermen daengheboden ghenade onder zijn vlercken
Niet en neempt tot verstercken, ons ghelooffs wanckelbaer
Die moetwillich verherden, met Pharaonis clercken
Dees zijn tallen percken in Gods haet dats claer
Maer die in ghehoorsaemheyt Saulo volghen naer
Diens sonden swaer werden wt ghenaden vergheuen
Dus wijckt van v boosheyt neemt den tijt van gratij waer
Want Godt haet den menschen die booslick leuen.
Niet langher en woont, inden ouden mensch
Doot v eyghen vleysch, zijt nieu herbooren
Gheen boosheyt verschoont, schout des werelts wensch
Die menighe reys, v tquaet leyt vooren
Op dat ghy niet en gaet verloren
Door Gods toren, cleyn en groot
Dus soeckt het broot // der zielen noot
Teghens de doot // die ons soud' bloot
Eewich bederuen
Gheen quaet bedrijft, want Paulus schrijft
Soo wie verstijft, in sonden blijft
Diens ziel sal steruen.
Nv alle natuerlicke menschen zijn vol ondeucht
En van haer ionghe ieucht dienaers der sonden
Want daer is niemant goet (iae niet een) also ghy meucht
Totten Romeynen lesen, want smenschen vreucht
Is ydel gheneucht, nae Dauids vermonden
En Godt haet den quaetdoender alst is beuonden
En dootlicke wonden, heeft hy hen bereyt
Sijn wy dan al in Gods haet en inde doot ghebonden
Waer is dan toirconden, dat Iohannes seyt
Dat Godt de werelt so lief ghehadt heyt
Dat hy niet heeft verbeyt met zijn eenighen soon
Maer heeft hem om onsent wille inde doot gheleyt
Dus moet Godt planteyt ons beminnen schoon
Maer die, die moetwillich sondighen teghens zijn gheboon
Verwerpende de croon die Gods volck is toegheschreuen
Dees haelen Gods haet op haer seluen en het dootlick loon
Want Godt haet den menschen die booslick leuen.
O ghy menschen broos, heel vol ydelheyt,
Hoe lang sult ghy noch, Gods haet verwecken
Door v sonden boos, waer me ghy bereyt
| |
[Folio L4r]
| |
V selffs gheessel toch', ick sal ontdecken
Want Gods haet, wy selffs op ons trecken
Door onse vlecken, tdoodtlick cruyt
Want Christus bruyt, naer tschrifts beduyt
Moet douden huyt, eerst trecken wt
Voor alle saecken:
Al istt vleysch suer, ten heeft gheen duer
Treckt aen een puer, nieu creatuer
Gods rijck sal naken.
Prince.
Prince al ist dat Godt terstondt tijtelick
De sonde vlijtelick niet en straft met plaghen
Als inden ouden testament die subijtelick
Van Godt ghestraft zijn, leeft daerom niet spijtelick
V is niet proffijtelick zijn lanckmoedich verdraeghen
En spreeckt niet ick hebbe ghesondicht sonder vertsaeghen
En wat leet is teenighen daeghen, mijn daerom gheschiet
Godt is barmhertich die al mijn sonden sal wt vaeghen
Hy heeft zijn behaeghen, aen den doot der sondaren niet
Maer daerneffens is hy oock rechtuaerdich hier wel op siet
Twelck beyde van hem vliet met haestich begeren
Maer zijnen tooren hy op de sondaers giet
En met verdriet sal hyse doen tormenteren
Dus versaemt met minnen wist v tot den Heer bekeeren
Eer de gramschap des Heeren, op v coemt ghedreuen
Die ter tijt der wraecke den quaeden sal condempneren
Want Godt haet den menschen die booslick leuen.
O Princelick Godt, ons eenighen Heyl
Ons boosheyt vergheet, die wy ons schamen
Hout het recht int slot, hebt ghenade veyl
V grati wtmeet, laet ons by namen
Heer by v, met minnen versamen,
Leyt ons wt blamen, in v feest
Dus minst en meest, Godt mindt en vreest
En door den Gheest, herboren weest
Wilt deucht aencleuen
Want Godt die haet, den menschen quaet
Die metter daet, naer tsvyandts raet
Booselick leuen.
Lieft baert vrede per Yselueer. |
|