Den Redenrijke constliefhebbers stichtelicke recreatie
(1599)–Anoniem Redenrijker constliefhebbers stichtelicke recreatie, Der–
Auteursrechtvrij
[Folio Q4r]
| |
Liedeken.
LOf prijs en eer // sy Godt door Nassous daet,
Die u o Heer // vreest en dient vroech en laet,
In uwe trouwe daden // al die ghy door hem brengt voort,
Dies hy te meer // hem met u woort beraet
Het volck te leer // als wijse Magistraet,
Zijn Vorstlicke ghenaden // te obedieren, hoort,
Ghy vrome Helden // wilt Gods lof melden,
En u Prins weert // obedieert,
Ghy onderdanen // laet u vermanen,
Tot bystant groot // uyt lieft ter noot,
Tis des Heeren begheert.
| |
Refereyn.
WEest wel gemoet alle ghy Batavische sinnen,
En niet versaecht ter oorsaec ws cleyn schijnende macht
Vwen ouersten velt Heer, God gaet u beminnen,
So hy u diemaels bethoont heeft (en noch) met cracht,
Betrout hem de saecken u vyandt vrolijck verwacht,
Ten sal hem nemmermeer aen middelen ghebreken,
Wie hy wil helpen die overwint zijt sulcx verdacht,
So voor dees tijt aen veel duysenden is ghebleecken,
Met DAVID meucht ghy wel tot Godts lof en eer spreecken,
Die warachtich op Godt betrout en hem vreest altijt,
Eeel hondert duysenden die rontsom na mijn steecken,
En sullen mijn doen vreesen Godt is mijn hulp subbijt,
Ghy Nederlantsche Bataviers schroomt niet in Godt verblijt,
Denckt die Godt betrouwen int strijden ghy Capiteynen,
Alsuclke Bataviers overtreffen d'oude Romeynen.
| |
Liedeken.Daer deur verblijt // ghy Capiteynen cloock,
Dat ghy al zijt // daer deur gheseghent oock,
Nu Godt hem gaet // beminnen, daer ghy mede trect int velt,
En voert subbijt // crijchsvolck aen yder hoock,
Lustich ten strijt // nae des Prinsen versoock,
Lof ende prijs sult ghy winnen // van hem ende oock goet gelt,
Vrome soldaten // wilt niet na laten,
Zijt cloeck ghesint // wat ghy begint,
Tvolck lustich sullen // u buycxken vullen,
Met goeden wijn // op elck termijn,
Sult ghy werden bemint.
| |
[Folio Q4v]
| |
Refereyn.Als d'oude Romeynen ergens ten strijde togen,
Om haer eygen vernuft en cracht hebben sy betrout
Was haer Vyant meest van Volck, op haer selfs vermogen,
Avontuerden syt, en begonnen den strijt seer stour,
Een hoge Faem ter Werelt presen sy bouen Gout,
Maer die trouwe Bataviers, geschiet meer eeren,
Die Goet en Bloet waghen voor t'lants welvaert menichfout,
Haer Faem bouen d'Romeynsche hoortmen Lauderen,
En na haer doot sy met Godt eewich Trijumpheren,
Ghy Helden des Nederlants draecht u manlijcken koen,
Die noch leuen, ick prijs u, ghy const u vroom weren,
Doen men ons Steden aentaste int Hollantsche saysoen,
Seer tyrannich maer om hulp ginckt ghy u tot Godt spoen,
Die maeckt haer versaecht datse voor u vloden groot en kleynen,
Alsulcke Bataviers overtreffen d'oude Romeynen.
| |
Liedeken.Die Helden fier // Bataviers recht voor dees,
Gedenckt men hier // hoe vroom hem elck bewees,
Doen t'lant was vol droefheden // Duc d'Alba Tryannie,
t'Briel eerst het vier // ontstack, dies t'Oorlogh rees,
t'Hoochduytsch bestier // quam ooc stracx twelckmen prees,
Veroverden veel Steden,, dies t'arme Volck wert vry,
Van s'Tyrants quellen // door DAVIDS vellen,
Des groten Reus,, wreet onfameus,
Trijumphelick haelden // elck t'geen niet faelden,
Haer lustich in // elck doort ghewin,
Riep al Viuelageus.
| |
Refereyn.Hoe wonderbaer Godt met u strijt in dees contreyen,
Ghy Bataviers die den Romeynen te bouen gaet,
Mochtmen mercken aen die belegherde Stat Leyen,
t'Iaer vijftien-hondert vier ent seuentich t'haerder baet,
BALDEVS van wegen den groten Commendeur obstinaet,
Met een groot Heyr van Spangiaerts wetende haer t'ontleden,
Wel dertien weecken daerom leggende beschanst vol haet,
t'Iammer des honghers was te groot in Stadt buyden reden,
Maer ghy Bataviers quaemt haer te hulp uyt allen Steden,
De Zee-dijcken door te grauen gaf Godt u t'verstant,
Met die wrede Zee-baren hebt ghy u vyant bestreden,
Hy most vluchten of drencken, als PHARAO met schant,
Int rode meer, te Scheep quaemt ghy daer eerst was drooch lant,
Spijsde Leyen, die Godt door u hulp uyt al haer weynen,
Alsulcke Bataviers overtreffen d'oude Romeynen.
| |
[Folio R1r]
| |
Refereyn.Den Vyant niet // gaerne liet elcx fortres,
Het is gheschiet // door dwanck moest hy expres,
Ons Batavische Heeren // elck was doen een Crijchsman,
t'Welck t'Alcmaer siet // 'tslot Rammekens oock des,
Het droeuich liet // van Ducx volck ghehoort es,
t'Geerten-Berch sy meest bleuen // weynich quamer doen van
s'Graefs Inquisitie,, creech Prejuditie,
Vuyt het Noortlant,, tot zijnder schandt,
s'Commendeurs schepen // werden ghegrepen,
Ghevelt opt stroom / voor Bergen t'Soom,
Trijumphelick en vroom.
| |
Liedeken.Prince. Wie den Prins aller Princen, als Velt-Heer comt vercloocken,
Die wert victorieus, al schijnt het onomghelijck te gheschien,
Want het blijckt, hem noyt gheen middelen hebben ontbroocken,
Om den Vyant verzaecht te maecken, met heeftet gesien,
Hoe menich Fort en Stadt MAVRITS van Nassou int ghebien
Corts heeft ghecreghen des Bataviers regent int wesen,
Elck scheen onwin-baer, Berck, Brevoort, die hy ginck bespien,
Oldezeel, Ootmers, Grol, Linghen, Coevoorden, desen,
Gaf Godt een verschrickt herte, vol ancx en vresen,
Door zijn Excelenti onsen Stadt-Houder voornoomt,
Die Godt betrouwt, eer, vreest, daer door hy is geresen,
In daden bouen alle Bataviers, die hem toecoomt,
Een onsterflijcke faem die door gheheel Europa stroomt,
Oock al die in zijn dienst staen hier in dese pleynen,
Alsulcke Bataviers overtreffen d'oude Romeynen.
| |
Refereyn.Prince.
't Leytsche ontset // scheen een werck Godts dit weet,
t'Welck altemet // verhaelt wert wijt en breet,
Daer door vermaert sal blyuen // u naem ghy Bataviers,
Door vreuchde net // menich van blijschap creet,
En onbelet // was groot Trijumph bereet,
Ter eer en int bedryuen // die vrome Bataelgiers,
MAVRITS genaden // oock so van daden,
Sloten en Steen,, brengt hy in vreen,
Niet min wy prijsen // maer eer bewijsen,
Als t'Instrument // van Godt ghesent,
Lof comt hem toe met reen.
TROOST MAECT IOLIIT. |
|