Den Redenrijke constliefhebbers stichtelicke recreatie
(1599)–Anoniem Redenrijker constliefhebbers stichtelicke recreatie, Der–
Auteursrechtvrij
[Folio K2r]
| |
Refereyn.
WAer in ons daden bouen de Romeynsche zijn te prysen,
Dees Vraghe brenght met de namen die Solutie voort,
De Romeynen, of ghenaemt de Romers na t'bewijsen,
Der Cronijcken, hebben oyt na Heerschappie ghespoort,
Want so haest als haer Stadt ghesticht was, heeftmer van gehoort,
Dats' een groten Naem sochten, al wast grondt-sop van bouen,
Die inde Stadt quamen om de Vryheyt van suyt en noort,
Want sy hielden vast beloften, men mochtse gelouen,
Sy Conquesteerden groten schadt door Oorlogh en rouen,
Ia trocken al de werelt door, sy vochten sy streden,
Wilden dat haer dapperheyt geacht wort 'tallen houen
Al om haer Faem en room te vermeren dat sy deden,
Haer selue te verheffen, sy tijtelicke eer smeden,
Maer wy Nederlanders geinclineert nederich en slecht,
Soecken gheen hoocheyt, noch swerelts eer hier beneden,
Maer cancken Godt dat hy ons jont kennis zijns woorts oprecht,
Daer door wy hem soecken te vresen en dienen als knecht,
Dies sulcke ons daden de Romeynsche overweluen,
En prijs waerdich zijn, hierom in nedericheyt gehecht,
Dat wy godt soecken te verheffen, en sy haer seluen,
Na t'stichten des Paus doms mocht yemant Argumenteren,
Heeftmen tot Romen den heylgen godts dienst voor al gedaen,
Ick segge die Sancten en Heyligen voor godt eeren,
Dats teghen Schriftuir, en so doende gaet men godt versmaden,
Ia dat meer is den Paus roeptmen in plaetse van godt aen,
Verbien te Schrift, die van godt getuyght den leecken te lesen,
Is dat godts eere wel ghesocht? Ick soud anders verstaen,
Het is met schanden gheblameert diemen hoort te vresen,
En lief te hebben onsen eenigen godt ghepresen,
Voor so veel goedertieren waeldaets van hem ghebleecken,
Sonder hem souden wy verloren gaen met ghenesen,
Men behoort ons salighmakers leer niet te versteecken,
Maer het Euangelium elck te jonnen te spreecken,
Van sulcx mach niemant in dit Batavische Nederlant,
Claghen, maer vry lesen leren ghelouen en preecken,
Hier in wy prijsen ons Maiestraet welck godts leer voort plant,
Ons besorcht met Kercken, trouwe Dienaers aen elcken cant,
Dies godt ghe-eert wert spijt d'Romeynen, diese bedeluen,
Het blijckt als t'gehoor ins ons rijst, versterckt in ons verstant.
Dat wy godt soecken te verheffen, en sy haer seluen.
| |
[Folio K2v]
| |
Romen sy successeurs te syn, PAVLVS schreef t'verclaren,
Aen den Romeynen so meent hy dees oock int lest besluyt,
Ick bid v hebt acht op de geen die ergernis baren,
En maken twedracht in dese leere wijckt van haer wt,
Want sulck diemen den heer IESV CHRISTO niet hoort tbeduyt,
Maer haer eygen buyck seyt PAVLVS ende sy verstrangen,
D'eenvoudiger herten door schoon spreecken en soet geluyt,
Wel te recht syn dit de Romeynen van ouer langhen,
Die d'eenvoudighe verleyden O gheslacht der slanghen,
Ghy verswijcht dat de salicheyt ons staet te verbeyen,
Alleen in Christo, maer wijst ons de verkeerde ghanghen,
Tot Sancten verstoruen Heylighen tis te beschreyen,
Voort ghoe wercken, die ons segt ghy ten hemel leyen,
Eylacij in ons vleysch en schuylt niet dan alle ondeucht,
Door tgehoor syns Woorts moet God ons hert bereyen,
Met den geest des geloofs in CHRISTO twelck den mensch verjeucht,
Dat wy dan god-lijcke daden doen soot een Christen veucht,
Twelck bouen de Romeynsche seg ick al waert haer eluen,
Prysselijck is waer nae ons mach volgen d'eewyge vreucht,
Dat wy God soecken te verheffen en sy haer seluen.
God salse ter nederslaen die haer seluen verheffen,
So de Schriftuyr leert daerom wel hem die den Heere vreest,
En hem vernedert in CHRISTI ghehoorsaemheyt effen,
Als Nassou hoochloflijcker memorien heeft geweest,
Een exempel merckelijck in syn tijt beghaeft met Gods gheest,
Heeft hem altoos in Gods onderdanicheyt begeuen,
Hoe geweldich dat syn vyanden haer verhieuen meest,
Na Gods beschreuen wille heeft hy de saeck gedreuen,
Lanckmoedich is hy in syn doen en laten gebleuen,
Hy en was noyt bloetdorstich noch houeerdich beraden,
In sy tegenspoet const hy met Pascientj leuen,
Als Dauid loofde en prees hy den heer wijs in daden,
By God hy nu triumpheert verhoocht is en onladen,
En den vyant verneert God door syn soon den vromen helt,
Tblijckt by de Victory corts gehaelt door Gods genaden,
Hoe hy haren naem verheft syn kerck bout en Leeraers stelt,
Sulcken Prins mint Godt strijt met hem pryst tvolcx daden int velt,
Tsynder eer, d'Romeynsche stincken hier by als vuyl scheluen,
Desen prijs passeert te bouen Iuwelen schat of gelt,
Dat wy God soecken te verheffen, en sy haer seluen.
Troost maect Iolijt. |
|