Den Redenrijke constliefhebbers stichtelicke recreatie
(1599)–Anoniem Redenrijker constliefhebbers stichtelicke recreatie, Der–
Auteursrechtvrij
[Folio I2r]
| |
Refereyn.
AL waren de Romeynen geluckich in haer strijden,
In Oorloghen bedreuen cloeck en vailliandich,
Haer daden waren qaet, ongerechtigh t'allen tijden,
Berouende haer Nabuyren sonder eenich mijden,
Als LIVIVS beschrijft met den Geest verstandich,
Soeckende Heerschappie bouen al quaet om lijden,
Sonder Fondament was haer Oorloch brandich,
Dat sy anvaerden dit maect haer vroomheyt schandich,
Onder alle Natien door haer wreede sinnen,
Ider te bederuen haer rijck te maecken volstandich,
Dat was haer Intentie, en haer beginnen,
Wie sou doch sulcke daden mogen beminnen,
Die door onrechtvaerdicheyt waren gedreuen,
Door valschen Godts-dienst, so wy bevinnen,
Daer geen gherechticheyt onder cost sweuen,
Ider was soeckende om in Heerschappie te leuen,
Ons daden niet gelijckende in genigher ghesetten,
Die bouen hun zijn te prysen om Godts woort verheuen,
Dat wy beschermen, oock wilt hier op letten,
In rechtveerdicheyt, religie, en Godlicke Wetten.
V gherechtigheyt Batavia seer wel ghebleken // is,
Als ghy u Vryheyt met het swaert bewaerde,
Daer cloeckheyt noch vroomheyt noyt verkeken // is,
Want dees daet byde Romeynsche vergeleken // is,
Bouen hun te prysen, als den Hemel van d'aerde,
Hoe wel u eertijts alle hulp en troost ontstreken // is,
Nochtans ghy noyt goet noch bloet en spaerde,
Als den Tyran u met d'Inquisitie beswaerde,
En socht s'Lants Priuilegien also te berouen,
Vroomelick stont ghy hem teghen cloeck met den swaerde,
Want al onse Steden socht hy te verdouen,
En ons met bloedighe Placcaten te bedrouen,
Als den Leeu noch sliep, was t'belegh Haerlem naeckende,
Menich Eedel Batavier gingk doen zijn crachten prouen,
Die om s'Landts Vryheyt neerstich waren wakende,
Soo lang hun den Honger ter doot toe was rakende,
O grote daden vol goeder Intentie,
Bouen u Romeynen diemen hier by is lakende,
Ons daden gaen u te bouen, want wy met Credentie,
Strijden om t'Vaderlandt en Vryheyt der Conscientie.
| |
[Folio I2v]
| |
Noyt en was Gerechtigheyt in u daden bevonden,
O ghy Romeynen Bloet-gierich en Moordadich,
Hoe wel Fortuna haer Banier hadde ontwonden,
V jonst toe gragende by tijden en stonden,
Waer door ghy door last waert allen landen schadich,
Die u daden insiet en recht wil door gonden,
Sal anders niet vinden dan een grouwel gestadich,
Vol ongherechtigheyt u nabuyren beladich,
Dies wy verclaren en hier me doen blijcken,
Waer in onse daden door Godts handt genadich,
Bouen u zijn te prysen in alle wijcken,
Door gherechtighe saeck die ons de baren pracktijcken,
Want Godt gaf wysheyt als wy schenen verlaten,
Doen Leyden was benout, men doorstack de dijcken,
Neptuni Zee-caluen quaemen t'onser baten,
Waer hoordemen oyt Romeynen van sulcke daden praten,
Want om ons Me-broeders te helpen uyt benouwen,
Vernielden wy ons landt O werck der Charitaten,
Waerdich bouen de Romeynen gheschiedende in trouwen,
Om Godts heylich woort en s'lants vryheyt te behouwen.
Prince.
Die om GODTS Princelick woort haer leuen waghen,
Om haer Vaderlants vryheyt de Tyrannen verdryuen,
Verdienen eenen lof ten eewighen daghen,
Haer werck is rechtveerdich onder vrienden en maghen,
Goddelick en heylich bouen de Romeynen te schryven,
t'Spruyt uyt Lieft, des vaderlants om te beiagen,
Gerustheyt der Conscientien die voor al moet beclyuen,
En vryheyt des vaderlants voor kinderen en wyuen,
Hier in zijn ons daden bouen de Romeynsche te prysen,
Al schenen sy vroom, waer sal haer ongerechticheyt blyuen,
Sy bedreuen gewelt, wy slachten den wysen,
Beschermen ons vryheyt met Ionghen en grijsen,
Voor bloedighe Placcaten, die ons Conscientien wroogen,
Dees exemplen noch vers in ons Memory rysen,
Hoe de Spaensche Tyrannen ons schier uyt sooghen,
Met den thienden penninck en als ons comt voor ooghen,
t'Vroomhertigh deffenderen van Orangien de Heere,
Waer door t'lof onser daden inden hemel is ghevlogen,
Bouen de Romeynen, en dat principael is meere,
Int beschermen der waerheyt en Christlicker leere.
t Spruyt uyt Lieft. SCHOVT NYT ALTYDT. |
|