Den Redenrijke constliefhebbers stichtelicke recreatie
(1599)–Anoniem Redenrijker constliefhebbers stichtelicke recreatie, Der–
Auteursrechtvrij
[Folio H4r]
| |
Refereyn.
LAetstmael ginck ick spaceren in RETHORICES Weyen,
Die verciert stonden met veel Blaeu ACOLEYEN,
Al naer t'betamen,
Ick sach daer PIRENEVS, en MYDAS scheyen,
En dat APOLLO met MINERVA quam sonder beyen
Met minnen versaemt,
Die my een questi vraechden, dat ick sou ramen,
Waer in ons daden bouen de Romeynsche famen,
Zijn te lauderen?
Soo ist dat den Propheet DANIEL sonder blamen,
Beschrijft van vier Monarchen, dies wy by namen,
Wel moghen beweren,
Dat dese laetste de wreetste is int tracteren,
Want sy de meeste Tyrannen der werelt heeft aenvanghen,
Vyanden der Waerheyt, die de Christenen persequeren,
En brengen den onnoselen in swaer verstrangen,
Die wy altijdt beschermen met groot verlangen,
En haer aenhangen // om liefde te bewijsen,
Met GODTS gauen die wy dagelicx ontfanghen,
Hier in syn ons daden bouen de Romeynsche te prysen.
Wy connen wel claerlick ghenoch doen blijcken,
Door EVSEBIVM, IOSEPHVM, en meer dierghelijcken,
Historien waerachtich,
Met wat wrede tyrannie en valsche practijcken,
De Romeynen ghecastijt hebben in alle wijcken,
'tVolck seer onsachtich,
Door overdaet, roouen, moorden, en branden crachtich,
Ghelijck MILENVS aen t'Roomsch Senaet was clachtich,
Ouer het groot getreur,
Twelck door de Romeynen met boosheyt voordachtich
Daghelicx gheschiede in Germania eendrachtich,
Oock stel ick u veur,
Hoe den gheleerden Hebreeuschen Ambassadeur
Tot Romen quam, en ginck haer oock vermonden,
Van Valerij Gracc, zijn tyrannich rigeur,
Die sy in Hebreen om regheren hadden gesonden,
By ons wert sulcken gewelt niet beuonden,
Maer t'allen stonden // hebben wy voor sulcx afgrysen,
In plaets van Tyrannij sachtmoedicheyt oorconden,
Hier in zijn ons daden bouen de Romeynsche te prysen.
| |
[Folio H4v]
| |
Dat ons daden bouen haer zijn prijs te gheven,
Wert met leuendige Exempelen beschreuen
Nae mijn verstant,
Discordia en gewelt zijn van ons gedreuen,
Daer Concordia in plaetse sit verheuen
Seer triumphant,
Doch beneffens die goede Policijen abondant,
Die de gemeynten in vreden houden plaisant,
Wilt hier op mercken,
Dus lief, goet, bloet, stellen wy vailliant,
Voor de Vryheyt des Christelicken geloofs te pant,
Als vrome Clercken,
Dat ons Godt verleent in zijn heylighe Kercken,
Daer wy vast op betrouwen in der liefden treyn,
Want het can ons cracht, en macht, doen verstercken,
Als ons den vyant wil verdrucken in s'werelts pleyn,
Ghelijck Dauid bewees aen Goliath den vileyn,
Doen hy hem certeyn // maeckte der Vogelen spysen,
Want hy was van Godt geweecken gelijck den Paus onreyn,
Hier in zijn ons daden bouen de Romeynsche te prysen.
Prince.
V comt den pijs toe oppersten PRINS omnipotent.
Daer naer onsen Prince MAVRITIVS excelent,
Met oock menich vroom Campioen,
Die de Romeynsche Tyrannen wederstaen diligent,
Om den onnoselen te beschermen aen allen ent,
Door Godts hulpe coen,
Want sy niet en laten te persequeren d'arme bloen,
Als sy ouer langhe ghedaen hebben, en noch doen,
Hoort myn vermellen,
Afgoden Dienaers, leerende t'volck een valsche sermoen,
Aspis ghebroet tot boosheyt sy haer geerne spoen,
Met Caims gesellen,
GODTS naem sy lasteren als PLVTO Godt der hellen,
Salt u niet erbarmen O almachtige Ciborie,
Maer ons vertrouwen, wy vast op u stellen,
Waer door wy hopen te eruen d'eewighe Glorie,
Want de Roomsche Monarchie is maer tijdtlicke memorie,
Maer Godts Consistorie,, sal eewigh verjolysen,
Wy gelouen in CHRISTVM, hy sendt ons Victorie,
Hier in zijn ons daden bouen de Romeynsche te prysen.
REYN GENVECHT. Laet den Aert goet zijn. |
|