Daerom doet wel, ende wilt niet meer soe seer bedroeft sijn noch oock so deerlijck claghen, maer ick soude v raden dat ghy soudt nemen eenen anderen man daer ghi troost ende raet af hebben mochte. ende dat ghy soudet trouwen mijnen dienaer Iudam, dye verstant heeft van als, ende watmen inder heeren houen behoeft om daer rentmeester te werden ende weet ooc wel wat totten huyshouwen behoort. Doe seyde Bore, om alder werelt goet en wildic dat niet doen. Doe seyde pylatus, vrouwe ghy en sult niet kiesen, dus gaet wat tot huys, tot dat ick v weder ontbiede, want ic hebbe nv sonderlinghe dinghen te doen. Doe scheyde Bore van dair, ende pilatus sprack heymelijc met Iudam ende seyde. Ghi en hebt rijcdom, noch, erfnis, landt, noch sandt, ende dese vrou is rijck van poscessien, van lande, ende is ooc rijck van ander goeden, van gout, siluer, ende van grote vrienden, dus wil di haer hebben tot v wijf so en derfdy nemmermeer ghebreck hebben. Doe seyde Iudas Heer soe veel als uwer gracien daer af belieft, ende mi daer toe raet des ben ic te vreden. Daer na dede Pilatus Bore weeder tot hem halen, ende seyde, vrouwe wilt niet meer dus weenen en claghen, en laet die sware melancolie varen dat ghi in gheen siecte en valt, ende ic sal v so grote vrienschap doen al waerdy mijn eyghen moeder. Dus moet ghi v seluen wat bedwinghen ende v weesen eerbaerlijck houwen also een eerbaer goede vrouwe toebehoort, ende ghi moet dincken dat v goede man doot is ende v droefheyt, v weenen, v claghen, en can hem niet weder leuende maken.
Auteursrechtvrij
