Der IX quaesten

¶Hoe Iheroboan dede zijn volck sondigen ende afgoden anbidden

Doe ginck Iherobooan woenen in den berch van Effraym. Ende als den tijt quamdattet volc van Israhel soude sacrificie ende offerhande doen in Iherusalem

[fol. A4r]

in den tempel des heren. Doe dacht Iheroboan in sijn herte, Gaet dit volck binnen Iherusalem om offerhande te doen in dat huys des heren so sal dat volck gekeert worden van mi ende si sullen mi doot slaen ende si sullen wederkeren tot Ioram. Door dit ghinck Iheroboan maken twee gulden afgoden. Ende hi seyde den volcke ghi sult niet meer gaen in Iherusalem, mer Israhel hier sijn v goden die v wt Egipten gheleyt hebben. Ende hi maecte eenen tempel ende eenen feestdach ghelijc men hielt in Iherusalem, alsmen dye afgoden soude sacrificie doen. ende hi maecte hem eenen altaer ende daer quam dat volc om te aenbeden de afgoden Als nv die coninc. Iheroboan stont ende gaf vieroock opden altaer voor die afgoden, so quam daer een man bidt woort des heeren ende hi riep met luyder stemmen. O altaer altaer daer sal gheboren werden wten huyse van Dauid Iosias gheheten, ende hi sal op v offeren die priesters des tempels die nv den vieroock op v offeren, ende de gebeente der menschen sullen op v verbrant werden Dit horende Iheroboan stack sijn hant totten man gods ende seyde, neemt mijn hant, ende de hant des conincs verdorde terstont ende hi en conste die niet weder tot hem trecken. Doe seyde de coninc. o man gods bidt voor mi Ende hi badt den heere, ende des conics hant wert weder ghelijck die te voren was Doe seyde die coninc. Comt met mi eeten ende drinken, ic sal v grote gauen gheuen De man gods seyde, ick en sal hier gheen broot eeten noch water drincken, want die heere heuet mi verboden ende so scheyde de man gods vanden coninc. Ende de coninc. Iheroboan en is niet ghekeert om deser woorden

[fol. A4v]

van sinen quaden weghe, mer hi dede noch teghen den heere, ende daerom sondichde Iheroboan, ende zij huys is gheheel vernielt ende al zijn gheslachte.