Der IX quaesten

¶Hoe Roboan raet hielt metten ouders. om antwoort te gheuen den volcke

Achter dat lyet Roboan vergaderen sijn oude raetsheren, dien hi vraechde raets wat hi best antwoorden mochte den volcke, die hem seiden verlicht den last vanden volc de ons v vader opgeleyt heeft, ende spreket totten volcke goede sachte woorden, ende si sullen v dienen ende onderdanich sijn.

Dair na ghinck hi te rade metten iongers die met hem opgeuoet waren, de hem rieden Segt den volck. Mijn vader heeft beswaert

[fol. A3v]

uwen last, mer ic salder noch meerder last toedoen ende mijnen cleenen vingher sal v swaerder sijn dan den rugghe van mijnen vader. Ende Raboan versmade den raet der ouders, ende antwoorde den volck sach dat hem die iongers geseyt hadden. Als dat volck sach dat hem die coninc. niet en wilde horen so scheyden si van hem ende maecten Iherobam coninc. ouer al Israhel, sonder dat gheslachte van Iuda, dat volchde roboan in Iherusalem. Daer na vergaderde Roboan dat huys van Iuda ende van Benyamin. hondert duysent.ende.lxxx. duysent wtghelesen vechtender mannen om te strijden tegen Israhel, ende weder te brenghen onder den coninc. Roboan. Doe quam die propheet Semeiam tot in Iherusalem segghende. Die heere seyt Ghi en sult niet strijden teghen u bruederen kinderen van Israhel, ende elck man sal keren in zijn huys. want dat is den wille des heeren Ende si hebben gehoort dat woort des heren, ende zijn elc tot haer huys ghegaen