Het prieel der gheestelicker melodiie

[p. 236]

☞ Een nieu konstich Liedeken

ghemaeckt op een snede, Van het versmaden des Werelts.

[p. 237]

 

HOort toe ghy ydel mensch die na de werelt staet,

 

Want al de glorie des werelts haest vergaet,

 

Hoe grooten Potentaet,

 

Hoe wijs hoe rijp van raet,

 

‘Tmoet toch al eens van hier, ‘tmoet wech, t’zy vroech oft laet,

 

Hoort toe ghy ydel mensch die nae de vverelt staet.

 

 

 

Waer zijn nu d’Orateurs met al haer schoonen praet,

 

Waer is nu Cicero, een mont seer delicaet?

 

‘Ten is haer al gheen baet,

 

Sy ligghen inden haet

 

Van all’ Godts Heylighen, en in d’eewich verwaet

 

Hoort toe ghy ydel mensch die nae de vverelt staet.

 

 

 

Waer is’tVrouwen geslacht, dat Asmodeus saet,

 

Dat haer soo net pareert, en soo die sielen schaet?

 

Met al haer Muskeliaet,

 

En kleeren ouer-daet?

 

Ter hellen zijn sy al ghegaen, recht als een draet,

 

Hoort toe ghy ydel mensch die nae de vverelt staet.

 

 

 

Waer is den Oorlochsman die’t al ter eerden slaet?

 

Waer is Pompeius macht, en Cesars wreeden daet?

 

Die fel en onuersaet

 

Klam tot den hoochsten graet:

 

Och sy zijn al gepaert, met d’helsche mooren quaet:

 

Hoort toe ghy ydel mensch die nae de vverelt staet.

 

 

 

Waer is de wijsheyt nu, wijsheyt van grooten blaet

 

Van Aristoteles, Plato en Xenocraet?

 

Haer Siel’ in d’helle braet

[p. 238]

 

Op een gloeyende plaet,

 

Daer Lucifer haer schinckt het peck al sonder maet

 

Hoort toe ghy ydel mensch die nae de vverelt staet.

 

 

 

Prince al haddy ‘tgoet van Cresus, dit wel vaet,

 

Den heelen Rijn vol gouts, vol peerlen den Euphraet:

 

Noch peerle, noch Achaet,

 

Noch kleet van gouden naet

 

En sal v volghen naer, de doot dit al versmaet:

 

Hoort toe ghy ydel mensch die nae de vverelt staet.

P. B.

FINIS.