Het prieel der gheestelicker melodiie

☞ Een ander,

Op de wijse: Alsoo’t beghint.

[p. 168]

O Schepper fier,
Hoe lustich ist om wesen,
Daer ghy zijt ghepresen
Van d’Enghels inden throon:
Wilt ons toch hier
Van allen druck ghenesen,
Heere uyt-ghelesen
Gheeft naermaels sulcken loon:
Dat ick v aenschijn mach aenschauwen,
En v gheboden onder-hauwen.
Heere iesus soet
Gheeft ons dat eeuwich goet.

Dat, etc.

[p. 169]

 

Wie soud’ die vreucht

 

En blijdschap konnen schrijuen,

 

Die sy daer bedrijuen

 

In Sions schoone pleyn:

 

Sy zijn verheucht,

 

Om dat sy moghen blijven

 

En altijdts beklijuen

 

By d’Lam Godts suyuer greyn:

 

d’Lammeken doet open ten thoone

 

Den boeck met seuen seghels schoone.

 

Heere, etc.

 

Dees stadt eerbaer

 

Is schoone bouen maten,

 

(Aenmerckt) want haer straten

 

Sijn van fijn gout planteyt:

 

d’Enghels aldaer

 

Met gulde wieroock-vaten,

 

Louen sonder laten

 

Tot inder eeuwicheyt,

 

En prijsen Godt van hemelrijcke,

 

Met soete lof-sanck en musijcke.

 

Heere, etc.

 

Die duyster nacht

 

Sietmen daer niet regneren:

 

Altijdt triompheren

 

Godts vrienden kler en schoon:

 

Met groote kracht

 

Sietmense iubileren,

 

En sonder cesseren

 

Singhen met soeten toon:

 

Daer en ghebreeckt noch sonne’ noch mane,

 

Noch ander licht by haer te stane.

 

Heere, etc.

[p. 170]

 

Prince minioot,

 

Wilt v met vlijt op maken,

 

Bidden ende waken,

 

Op dese vreucht doch let:

 

Kleyn ende groot

 

Naer desen staet wilt haken,

 

Die daer in gheraken

 

Moeten zijn onbesmet:

 

Sy zijn bekleedt met witte zijde,

 

Louen den Heer’ met herten blijde.

 

Heere, etc.