Het prieel der gheestelicker melodiie
(1617)–Anoniem Het prieel der gheestelicker melodiie–
AuteursrechtvrijOp de wijse. Aue der maechden kroone.
O Heer’ ick mach wel klaghen
En schreyen dach en nacht,
Dat ick soo all’ mijn daghen
O Heer’ v heb veracht:
Och hadd’ ick dit wel bedacht,
En van sonden my ghewacht:
Want groot is uwe macht.
Och, etc.
V dienaer wilt ontfermen,
Die hem soo heeft ontgaen,
Aenhoort sijn bitter kermen,
Hy roept v Vader aen:
Met den armen Publicaen
Voor sijn borst soo komt hy slaen,
Wilt hem als kindt ontfaen.
Met, etc.
O Heere van hier bouen
Wilt mijns ghenadich zijn,
| |
[pagina 163]
| |
Ick sal v altijts louen,
Weert my dat helsch fenijn:
Daer en is gheen meerder pijn,
Dan te deruen v aenschijn,
O hemelsch’ Medecijn.
Daer, etc.
O Heer’ als ick sal steruen,
En zijn in grooten noot,
En wilt my niet bederuen,
Al zijn mijn sonden groot:
Laet my doch door v bloet root
(Al ben ick van deuchden bloot)
Ontgaen de tweede doot.
Laet, etc.
Wilt my v graci’ gheuen,
En maeckt my dus ydoon
T’ontfanghen in mijn leuen
Al die Pardoenen schoon:
Om te krijghen goeden loon,
En hooren den schoonen thoon,
Komt bruyt ontfanght de kroon
Om te, etc.
O Iesu hooch gheboren,
Ghy zijt ghebenedijt,
En laetse niet verloren,
Noch heel vermaledijt,
Die in’t Vagheviers ghekrijt
Suyueren nu haer habijt,
Om’t eeuwich schoon iolijt.
Die, etc.
Ick wil my gaen begheuen
Tot alle deucht voorwaer,
Eer ick worde verdreuen:
| |
[pagina 164]
| |
Paulus leert openbaer,
Datter een vier is hier naer
Het welck maeckt de siele klaer,
En lost de sonden swaer.
Datter, etc.
Caluin die macht hem stooren,
Want hy was loos en fel,
Maer hy en sal’t niet hooren,
Hy is nu inde hel:
Daer is hy door Godts beuel,
Blijuen sal daer in’t ghequel,
‘Tgheloof leert my dat wel.
Daer, etc.
Peyst om d’ure, L. De Q. |
|