Het prieel der gheestelicker melodiie

[p. 88]

☞ Een ander,

op de wijse: Alsoo ‘t beghint.

LAet ons met herten reene
Louen dat soete kindeken kleene:
Het brenght uyt den weene.

Ons in een kindt ghebooren,

Een Soon ghepresenteert:
Hy komt de hell’ verstooren,
Als mensch ghefigureert:
Godt ende mensch met eene,
Onser verlosser goet alleene
Wort hier met ons ghemeene.

Laet ons, etc.

Dies moghen wy wel eeren

Die maghet die hem droech,
Dien grooten Heer der Heeren,
Die haer niet en verwoech:
Sy is, en anders gheeene,
Moeder, en suyver maecht ghemeene.

Laet ons, etc.

Groet alle vriendelijcke

Die schoone suyuer ieucht:
Men vandt noyt haers ghelijcke:
Sy mach wel zijn verheucht:
Sy is, en anders gheene,
Moeder, en suyuer maecht alleene:
Godt is met haer ghemeene.

Laet ons, etc.

Ghe-eert soo moet dan wesen,

Nu, en tot aller tijdt,
De moeder Godts ghepresen,

[p. 89]

 

All ist de ketters spijt:

 

Sy is, en anders gheene

 

Moeder, en suyuer maecht alleene:

 

Godt is met haer ghemeene.

 

Laet ons, etc.