Het prieel der gheestelicker melodiie
(1617)–Anoniem Het prieel der gheestelicker melodiie–
Auteursrechtvrij
[pagina 84]
| |
MEt desen nieuwen Iaere
Soo wort ons openbare,
Hoe dat een maecht vruchtbare
Die werelt heeft verblijt:
Ghelouet moet zijn
Dat soete kindekijn,
Ghe-eert moet oock zijn
Dat soete maechdekijn
Nu en eeuwelick tot aller tijdt.
Ghelouet, etc.
Hoe wel was sy te moede,
Doen sy in vleesch en bloede
Aensach haers herten hoede,
Den Heer’ der werelt wijt.
Ghelouet, etc.
Sy baerd’ hem sonder pijne,
En bleef een maghet fijne,
Des sondaers medecijne:
Dies is die Ioden nijt.
Ghelouet, etc.
Die Enghels songhen schoone,
Glori’ al inden throone,
Ter eeren, en ter kroone
Des kints ghebenedijt.
Ghelouet, etc.
Naer acht daghen gheleden
Soo wert Iesus besneden,
Al naer der Ioden seden,
T’welck ons van sonden vrijt.
Ghelouet, etc.
|
|
