Het prieel der gheestelicker melodiie
(1617)–Anoniem Het prieel der gheestelicker melodiie–
Auteursrechtvrij
[pagina 66]
| |
WAer is die Docher van Syoen,
Ick soud’ haer blijde maken:
Ick soude haer een bootschap doen
Van alsoo groote saken
Ick, etc.
Als men de werelt al beschreef,
Soo wert de maghet moeder,
Te Bethleem daer sy doen bleef,
Van ‘tkint onsen behoeder.
Te, etc.
En glas al ist dat schijnt daer door,
Ten breeckt niet vander Sonnen:
Soo heeft sy maghet naer en voor
Dat salich kint ghewonnen.
Soo, etc.
En duysternis is ons verklaert,
Een licht is opgeresen:
Een maghet heeft een kint ghebaert,
Dat dunckt ons wonder wesen.
Een, etc.
O wonder moeder, wonder kint,
Moeder en maecht ghepresen:
Maer ‘tkindt dat sy in doecxkens windt
Komt ons wonden ghenesen.
Maer, etc.
Maria nam hem op den schoot,
Sy cust’ hem aenden monde:
Die liefde hadde sy deer groot
Tot hem in alle stonde.
Die, etc.
| |
[pagina 67]
| |
Lof Heere moet v altijdts zijn:
Wilt ons (o Heer’) gheleyden
Met Maria de moeder dijn
Als wy al van hier scheyden.
Met, etc.
|
|
