Het prieel der gheestelicker melodiie


☞ Salue Regina, Op de wijse Komt schepper Heylich gheest. O Koninghinne vroet Ghegroet zijt en ghepresen Moeder bermhertigh soet, Ootmoedich wesen. Moeder, etc. Ons leuen, soeticheyt, Gheseyt met de waerhede Ons hope, die ons greyt, Ghegroet vol vrede. Ons hope, etc. Wy roepen nu tot dy, Wy kinderen van Eua, En ballinghen onvrij, Hoort ons Maria. En ballinghen, etc.
[pagina 30]
Tot v breet ende smal Wy al suchten en weenen, Hier in dit tranen-dal, Wilt troost verleenen. Hier in, etc. Onse voorsprake dan Wel aen, u ooghskens teeren Wilt tot ons (die sulck kan) Bermhertich keeren. Wilt tot, etc. Ende dijns lichaems vrucht Iesum Christum wilt tooghen Ons, nae dit swaer versucht, En s’doodts ghedooghen. Ons, etc. O saechtmoedichst’ eenpaer Voorwaer goet en idoone: O ghenadichst’ eerbaer, Maria schoone. O genadichst’, etc. Bidt dat wy weerdich zijn (O Moeder Godts beseuen) Der beloften divijn Christi verheuen. Der, etc. Verkert ons druck in vreucht, Iont deucht en peys eendrachtich, Want ghy vele vermeucht By Godt almachtich. Want ghy, etc.