Het prieel der gheestelicker melodiie

[p. 24]

☞ Een ander,

op de wijse: Dit is een uyt-vercoren vat.

GHy gheestelicke Maechden soet
Wilt met Lofsanghen prijsen
Maria die reyn maghet goet,
Wilt haer doch eer’ bewijsen.      Maria, etc.

Wilt haer altijdt naer mijn bedien

Als maeght en moeder eeren,
Die van t’beghinsel was voor-sien
Tot een Moeder des Heeren.      Die van, etc.

Sy is die maghet sonder smet,

Een Vrouw’ van groote krachten,
T’hooft des serpents heeft sy verplet,
Eert haer alle gheslachten.      T’hooft, etc.

Esaias die heeft van haer

Ghepropheteert waerachtich,
Dat sy ons baren soud’ voorwaer
Den Sone Godts almachtich.      Dat sy, etc.

Sy was verciert die suyuer maecht

Met deuchden overvloedich,
Maer sonderlingh’ heeft Godt behaecht
Om dat sy was ootmoedich.      Maer, etc.

Gheen tonghe kan uytspreken, siet,

Haer deucht, en heylich leuen:
Een herte kan’t bedencken niet
Hoe sy nu is verheuen.      Gheen, etc.

Dus prijst haer maechden fijn,

Haer deuchden wilt aenmercken:
Wilt ghy met haer in vreuchden zijn,
Volght naer haer goede wercken.

Wilt, etc.