Politieke balladen, refereinen, liederen en spotdichten der XVIe eeuw

Refereyn.

Veel geluckighe sotten nu regneren,
Die ter weerelt werden nu wel bekent gaen.
Gheluckighe sotten hen hooghe funderen,
Gheluckighe sotten in goet regiment staen,
Gheluckighe sotten regieren het convent waen;
Beter waren zy weert gheregiert te zyne.
Gheluckighe sotten in 't parlement gaen,
't Gheluck es cause der wijsheit ten fine;
Het gheluck gaet dicwil voor groote doctrine,
Die 't vanghen can, die macht ooc smaken wel.
Zulc zot die crijghet met cleender pine,

[p. 324]

 

Daer andere wyse dickwils om waken wel;

 

Gheluckighe zotten, slaet sonder misruk wel,

 

Het sal u andalen, wie dat mesprijs seyt:

 

Gheluckighe sotten en behouven gheen wijsheyt.

 

 

 

't Gheluc des weerelts es menigherande;

 

Maer zoude den gheluckighen gheen wijsheyt behouven,

 

Dit gaet eensdeels byten mynen verstande;

 

Maer redene natuerlic doet my dit prouven,

 

Als 't geluc den man dus wilt deurgrouven,

 

Dat hem wel gaet, dat zijn beleet zy;

 

Maer zegghen zulc nydighe zonder touven

 

't Geluc gaet boven zijn wijsheyt breet, vry.

 

Wijsheyt dient den gheluckighen ghereet by;

 

Maer die 't geluc heeft die heeft nu wijsheyt groot,

 

Al waer hy van wijsheyt ghescoren, dat weet hy.

 

Het gheluc bewaert hem vry van zorghen bloot,

 

Maer d'ongheluckighe hebben altoos wederstoot,

 

Zegghende in elcx conroot, die nydighe advijs leyt:

 

Gheluckighe zotten en behouven gheen wijsheit.

 

 

 

Sotten, die daghelicx als wyse verkeeren;

 

Sotten, die elcken te passe gapen;

 

Sotten, die hooghe clemmen zonder leeren;

 

Sotten, die 't geluc der weerelt betrapen;

 

Sotten, die nemmermeer niet en verslapen,

 

Wint, noch weder, noch eenich ghetyde;

 

Sotten, die alomme effen rapen,

[p. 325]

 

In 't hooghe, in 't nedre, in 't nauwe, in 't wyde;

 

Sotten die 't altijts spinnen ter zyde;

 

Sotten die van allen dynck bevrijt zijn,

 

Als gheluckighe sotten van herten blyde;

 

Sotten die ontgaen, waer zy in strijdt zijn;

 

Dese sotten moghen wel in elcx belijt zijn,

 

En ooc bemint zijn, wie dat advijs greyt:

 

Gheluckighe sotten en behouven gheen wijsheyt.

 

 

 

Zulck sot zal willen den voghel schieten,

 

Al en heeft zulck sot const noch cracht in;

 

Nochtans siet men zynen schicht voorder vlieten

 

Dan de zulcke die wijs es ende heeft macht in,

 

De fortune des weerelts es hier gheacht in,

 

Den eenen dalen, den anderen rysen doet,

 

Al werdender de wyse dicwils ontsacht in;

 

Nochtans fortune haer recht bewysen doet,

 

Die se toecomt, met rechte hy se prysen moet,

 

Als wel ghefortuneert in der nature,

 

Om het goet der weerelt zulc by advyse vroet,

 

Nochtans en zal 't hem nemmermeer ghebueren;

 

Maer gheluckighe sotten die 't avontueren,

 

't Allen hueren, de gheluckighe toereyt:

 

Gheluckighe sotten en behouven gheen wijsheyt.