Politieke balladen, refereinen, liederen en spotdichten der XVIe eeuw
(ca. 1840)–Anoniem Politieke balladen, refereinen–
Auteursrechtvrij
[pagina 133]
| |
't Sal haest belet sijn deur des Princen bystant,
Die zijn volck vergaren sal met groote ghetalen,
Inghelsche, Schotten, Franchoisen en Duutschen plaisant;
Want uut alle quartieren heeft hy se doen halen
Om Artois en Henegauwen end' alle de Walen
Te verbranden, pillieren en te doene te nieten.
Ghendt, Brugghe en Ypere,
en vreest niet u palen
Datter schade zal gebeuren door vechten oft schieten:
Den Papauwen sal noch haer leven verdrieten,
Door de macht ende wijsheit des
Princen van Oraignen,
Ghelijck de crevitsen gaen in Spaignen.
Brabant en Vlaenderlant, u sal hy
bevryden,
Ghelijck hy in voorleden tyden Haerlem heeft
ghedaen
En Naerden, dat hy oock in allen syden
Voorsach, dat hem gheen droufheit en coust bestaen.
Door Sperrendam maect' hy dat alle victuaille
zaen
Passeerde, zoo sal 't in Vlaenderen oock
ghebeuren.
Berghen in Henegauwe heeft hy ontset beraen,
Mechelen heeft hy oock verlost van treuren,
Dendermonde hilt hy met ghewelt tot allen heuren,
Audenaerde en coust hem niemandt ontvinden,
Maestricht door ontset bevryde hy van beseuren,
Al dat hem teghen was sagh men hem oynt verslinden.
Niemant zal teghen Vlaenderen durven den standaert
ontwinden,
Door de macht en wijsheit des Princen van Oraignen,
Ghelijc de crevitsen gaen in Spaignen.
| |
[pagina 134]
| |
Rijssele heeft hy oock inghenomen met machte,
En met subtylen ghedachte Aultrive sterck.
Binnen Aelst domineert hy met al sijn gheslachte.
Verhueght u nu, Vlaenderen, met al u ghewerck,
Want
La Noue sal brynghen, uut 't fransche
perck,
Om u te bewaren, hondert duusent voetknechten,
En
Casimirus die es te beene, verstaet dit
merck,
Met zessendertich dusent ruyters fraey om vechten.
De coninghinne van Inghelant wilt u oock
berechten,
Dry hondert duysent volcx senden, om u verfraeyen,
Met steerten als monsteren in 't gat, die sullen 't al
slechten
Dat men 't van Artois tot Venegien sal
sien laeyen.
Zy sullen hier t'samen vergaren, niemant sal ons beschaeyen,
Deur de cracht en wijsheit van den
Prince van Oraignen,
Ghelijck de crevitsen gaen in Spaignen.
Prince, dit al vulcommen zijnde, noyt meerder wondere;
Van de zeventhien landen wert hy erfachtich heere.
Elck Italiaen verlynght naer hem, bysondere
Om binnen Roome hem te halen met snellen keere
Dat hy daer eenen Paus moght stellen naer sijn leere,
Goet en rechtvaerdich als hy es bevonden,
Hatende het quaet en beminnende de dueght zeere.
Die van Granaden hebben oock om hem ghesonden,
Want daer hy niet en es, faelt pollitie ten stonden,
Neerynghe noch coomanschepe en siet mer domineren;
Al gloria, laus es in 't Neerlant deur hem, ic moet
oorconden,
Waren zy hem quyte sy souden declineren.
| |
[pagina 135]
| |
In Vlaenderen siet men Gods woort floreren
Door de cracht en wijsheit des Princen van Oraignen,
Ghelijc de crevitsen gaen in Spaignen.
1579.
L.H.M.
|
|