Parnassus, dat is den Blijen-bergh

[p. 114]

Hier volghen sommighe stichtighe Liedekens van recreatie. Tot lof van alle deughdelijcke Vrouwen.

Op de wijse: Den tijdt is hier, &c.

Salomon die prijst, een goede Vrou eersame,
Want uyt haer so rijst, alle solaes en vreucht,
Daer sy mede spijst, den man seer wel bequamen,
Als sy hem bewijst, reyn liefde met haer deucht,
Door haer soete sprake maeckt sy den man verheucht,
Haer vrolijcke manieren goet,
Sijn boven violieren soet,
Den man sy vreucht hanteren doet,
Door haer reyn suyver jeucht.

Gehoorsaem en goet, is een geschickte Vrouwe,

Sy eert haren man soet, als Sara Abraham,
Eerbaer wijs en vroet, als Rebecca ghetrouwe,
Die Iac metterspoet, voor sijn huysvrouwe nam,
Schamel en onnoosel als Rachel van rijcken stam,
Daer Iacob veerthien jaren lanck,
Om diende sonder beswaren cranck,
Hy voerdense wech met haren danck,
Van sijnen Oom Laban.

In’t boeck Esdras daer, wort hooghelijck gepresen,

Een vrouwe eerbaer, dat sy te boven gaet,
In sterckheyt veurwaer, den Coninck uytgelesen,
Oock den wijn seer claer, soo daer geschreven staet,
Want het is ghebleken aen Iudich metter daet,
Die vromelijck afgheslaghen heeft,
Holofernis hooft vol plaghen sneeft,
Dat sy me ghedraghen heeft,
In Betulia delicaet.

[p. 115]

 

Siet Abigael, heeft oock perdoen verkreghen,

 

Veur haren man fel, daer David op was verstoort

 

Want sy is hem snel, met spijse ghecomen teghen

 

Deur haer spreken wel, maeckten sy goet accoort,

 

Haer soete wijse woorden heeft David aengehoort

 

Daerom heeft hy ghebenedijt

 

Abigael die seker zijt,

 

Haer huysghesin heeft sy bevrijt,

 

Van sulcken grooten moort.

 

Assuerus seer quaet, meynde de Ioodtsche natie,

 

Geheel Abrahams saet, op eenen dach te verslaen,

 

Door den boosen raet, van Amans informatie,

 

Waren desperaet, allen die Ioden saen,

 

Hester die Coninginne quam by Assuerus staen,

 

Daer beden hem moveerden wel,

 

Sijn gramschap die cesseerden snel,

 

Daerom hy ordineerden wel,

 

Die Ioden vry te gaen.

 

Hierom wel aensiet, wat een goey Vrou can maken,

 

Droefhz oft verdriet, wort van haer niet vermeert

 

Anders en soeckt sy niet, dan vrede in alle saken,

 

Als daer twist gheschiet, sy dien te besten keert,

 

Alle haer huysghesinne sy goede seden leert,

 

Sy is een Spieghel schoon verciert,

 

Deur haer deughden die sy hantiert,

 

Deur sulcken Vrouw wel ghemaniert,

 

Wordt eenen man gheeert.

 

Prince Idoon, hebt ghy een Vrouw verheven,

 

Van deuchden schoon wilt haer beminnen dan,

 

Paulus in persoon, heeft haer oock prijs gegeven

 

Dat sy is een croon, en glorie van haren man,

 

Salich is den minnaer die hier vercrijghen kan,

 

Een deughdelijcke Vrouwe fris,

 

Die haren man ghetrouwe is,

 

Certeyn gheen berouwenis

 

Sal hem daer comen van.

N.I.