Oud-Vlaemsche liederen en andere gedichten der XIVe en XVe eeuwen

[p. 98]

XXXIX. [Trouwe, ere, goet, zin, hertze, ende moet]

Trouwe, ere, goet, zin, hertze, ende moet,
Reine vrauwe, es eighin dijn.
Ic weinsche u eere vor enich goet,
Contrarie hem die wroughers sijn.
Eighin dijn
Es therte mijn,
Wat ghi mi doet.

Troost van u, vrouwe, dats mijn behoet,
Rooft mi alleyn uut zorgen pijn,
In u so rust mijns hertzen bloet,
Claerre dan der zonnen scijn.
Eighin dijn
Es therte mijn,
Wat ghi mi doet.

Toocht mir ghenaden, beilde zoet,
Recht blivic stede in trauwen fijn.
Ic meene al goet, des wilt zijn vroet;
Comt mi in hulpen, vrouwe mijn.
Eighin dijn
Es therte mijn,
Wat ghi mi doet.