Die nuwe brandwag. Tydskrif vir kuns en lettere. Jaargang 1930

[p. 125]

Traumerei.

Had ek tog maar die blond en die hemelsblou;
Diamante omskep uit die môre-dou;
Die glinst'rende strale van sonnige goud;
Die heerlike groen van 'n digte woud;
Die spier-sneeuwit blankheid van 'n vlokkige wolk,
Dan kon ek met die, dalks, my liefde vertolk!

'n Kleed sou ek weef soos vir feeë berei word;
Die kleed sou dan oop voor jou voete gesprei word,
Met sy blond en sy blou, en sy goud en sy groen;
Daarop sou ek kniel om jou hulde te doen;
Die dou-diamante sou ek inryg soos krale
In blinkende stringe van skitterende strale - -

Maar helaas! Ek het niks as 'n droom, o, so soet!
Tree saggies! Jy trap op my droom met jou voet!

JUWIME.