Die nuwe brandwag. Tydskrif vir kuns en lettere. Jaargang 1929

[p. 167]

In Memoriam A.G. Visser.

Te kort die aanhef van jou digtersang,
Te swaar die slag om swyend te verduur;
Ons wou die spranke van jou digtervuur
Vir jare nog so gretiglik opvang.
So nodig was jy vir ons volksbelang,
So onontbeerlik vir ons jong kultuur,
Ons voel in hierdie droewe skeidingsuur
Jou eerste lied was ook jou swanesang.

Maar vir Jou doel het jy genoeg gesing,
Jou kragte aan 'n edel taal bestee;
'n Boodskap het jy aan jou volk gebring,
Jou veelbeminde taal 'n lied gegee
Wat tot ons diepste wese binnedring -
Omfloers met rose van herinnering.

I.D. DU PLESSIS.

Kaapstad, 1929.