Skoonheid.
1. Die Skoonheid van Kleanthe.
Kleanthe, almal is verlief op jou,
Maar jy - jy is verlief net op jouself.
As jare wysheid bring of winterskou,
Sal jy - nog steeds verlief wees op jouself.
2. Die Skoonheid van Helena.
O soeter as die vrug van Hubla-by,
En fyner dan die Middel-see se blou!
Voor jou word duisend harte uitgesprei
Vandag: en môre is dit net soos nou.
3. Die Skoonheid van Aegle.
Staan digter om jul skimme-drom
Wat saam met Aegle word geroei;
Of Charon meen dalk hy's nog jonk
En sy - nog in haar lewensbloei.
4. Die Skoonheid van Theophite.
Die uiterlik vermom die gees
Vir oppervlakkig-siende oog;
Soos ster ontnewel vér omhoog
Sal jy vir siende oë wees.
5. Die Skoonheid van Tant' Lettie.
Die liggaam lomp, verstand maar min verfyn,
Stem onbeskaaf, brand-arm; maar in haar hart
Lê daar 'n mag van goud - diep is die myn
Van teer gevoel, met wil van stoisyn
- Die sagte goud in harde kwarts verberg.
Daar's humor wat deur trane lag en tart
Die slae van die Noodlot, harte-rein.
En woed die lewensstorm driedubbel-erg,
Self ly sy, ander red sy uit hul smart:
En ander babbel oor hul brekend' hart,
Maar onvertolk bly al haar stille pyn.
Gedeeltelijk auteursrechtelijk beschermd