Noordnederlandse Historiebijbel
(1998)–Anoniem Noordnederlandse Historiebijbel–
Auteursrechtelijk beschermd
[Folio 244vb]
| |
van Romen. Ende Anthonius hadde sijn suster. Ende hi hadde Anthonius coninc gemaect van Egipten. Ende doe Anthonius machtich ende rijc wort, doe dede hi des keysers suster van hem ende nam een ander wijf ende versettede hem jegen den keyser. Ende daerna quamen si jegen malcander te stride. Ende daer wort so voel volcs verslegen in die strijt, dat men niet voel en vint bescreven, daer meer volcs bleef dan in die strijt. Ende Cleopatra, sijn wijf, die dede serpenten haer borsten sugen. Ende van die venijn bleef si doot. Doe Octavianus die strijt gewonnen hadde, daer wonnen die Romeynen also groten roef, sodat si also rijc worden, sodat si den keyser hieteden Augustus. Dat is oeckende ende vermerende. Doe docht Augustus om Herodes, die hi so grote macht gegeven hadde, of hi hem yet jegen hem versetten woude, ende toech derwaert. Mer Herodes toech den keyser jegens, niet als een coninc mer als een knecht, ende viel voer hem te voet ende seide: "Here keyser, ic lye dat ic Antonius getrouwe vrient was. Mer nu hi verwonnen is, so lyde ic mede verwonnen. Ende ic geef u die croen op. Dat doe ic opten hoep, of ic gracie van u mocht ontfangen." Omdat Herodes smeecte, so wort hi Augustus vrient. Ende hi gaf hem die croen ende vermerede sijn macht. Herodes maecte een stede ende hietse Cesaria. Ende | |
[Folio 245ra]
| |
hi maecte een stede, hiet Ascolon. Ende op die poert die voir den tempel stont in Jherusalem, die Speciosa hiet, daer sette hi op een gulden aern in die eer van den keyser. Mer daer waren die joden toornich om ende seiden dat dat jegen God was ende jegen die wet. Daerna maecte hi een stercke stede ende hietse Herodien. Daerna doe maecte hi Samarien weder op ende noemdet Sebasten. Ende hi maecte een stede op die Jordaen ende noemdese Fazelus, na sinen brueder. Daerna vercyerde hi den tempel in Jherusalem ende vercierde Jherusalem mit sconen, vasten toornen. Daerna doe quamen sijn twee kinder van der scolen, die int keysers hof gewoent hadden, als Alexander ende Aristobulus. Alexander die gaf hi sijnre suster dochter te wive. Ende Aristobulus die nam des conincs dochter van Capadocien. Daerna begonden si tegen den vader te kyven om dat rijc van Jherusalem. Ende doe Herodes dat vernam, doe verdreef hi sijn twee kinder, die outste, ende sette Antipater, die joncste, na sijn doot in sijn rijc. Doe togen sijn twee kinderen te Romen om over hem te clagen.
Dat is dat eynde van dat Oude Testament. Daerom, laet u dat Oude Testament een leer wesen. Ende denc dat al die in Noen tijt waren, verdrencten om der sonden willen jegen natueren. Ende | |
[Folio 245rb]
| |
denct hoe dat God die joden plaechde, als si die afgoden anbeden. Ende denc dat al die heydenen, die afgoden anbaden, in der geloven niet gerekent en sijn dan honden. Daerom wacht hem een ygelic kersten mensche dat hi geen afgoden an en bede, noch dat hi niet en gelove in segenen, in meten, noch in tovernye, want wat daerof gesciet, dat doet die duvel. Daerom heeftet God verboden op die ewige verdomenisse. Daerom sie een ygelic kersten mensch, dat hi hem daervoer wacht.
God sy gelooft.
Hoc opus exegi, Cristo sit gloria Regi.
Et sic est finis, sit laus et gloria Trinis.
Scriptor scripsisset bene melius, si potuisset.
Qui scripsit scripta, sua dextera sit benedicta. Amen.
Qui legit, emendat; scriptorem non reprehendat.
Hier eyndet dat Oude Testament ende wort begonnen op Sinte-Geertruudsdach in | |
[Folio 245va]
| |
in die vasten int jaer ons Heren 1300 ende 58. Ende het wort daerna geeynt op Sinte-Victorsavont. |
|