Noordnederlandse Historiebijbel

Van die coninc ende biscop die quade Alexander

[Tekst]

Aristobulus en liet geen kinder, mer sijn wijf dede sijn 3 bruederen uut den kercker ende maecte den outsten coninc van Jherusalem. Hi sloech sinen brueder doot, omdat hi meende dat hi hem dat rijc ofwinnen woude. Ende sijn wijf hiet Alexandra ende was oec quaet van natueren. Omdat die oude ende die wise hem beruspeden van sinen quaetheit, so dode hi daer wel 50.000 menschen.

Op een tijt doe vraechde hi den joden in Jherusalem waermede hi haer vrientscap best mocht crigen. Doe seiden si: mit sinen doot. Ende daerom verhinc hi te Jherusalem bi der straten wel 800 mannen. Ende hi dode haer wiven ende haer kinderen. Hi was coninc ende biscop 38 jaer. Hi hadde twee kinderen: Aristobulus ende Yrcaen. Omdat hi wel wist dat men sine kinder in Jherusalem hatede om sijnre quaetheit willen, so beval hi dat rijc sinen wive. Doe Alexander doot was, doe maecte Alexandra

[fol. 240va]

haren outsten soen biscop in Jherusalem, want hi was guedertieren. Ende haer ander soen Aristobulus die was wreet. Die hielt si onder dwanc.

In die tijt begonsten eerst die Phariseen te comen. Ende die nam si te rade. Ende si dede den joden voel verdriets. Ende daerom so viel daer voel an Aristobulus. Ende Aristobulus vergaderde voel volcs ende vinc sijn moeder ende hare kinderen ende hieltse gevangen leggen. Doe Alexander doot was, doe vergaderde Aristobulus voel volcs om sijn brueder Yrcaen, die biscop was van Jherusalem, te verdriven, mer Yrcaen hadde een heydens, wijs man bi hem, die Antipater hiet ende was van Ydumea geboren. Hi dede al bi sinen rade. Op die tijt was Cyrien sonder coninc, want Pompeyus haddet gewonnen ende te tijns geset onder die van Romen. Doe hi hoerde dat die bruederen twisten om Judeen, doe meende hi: hi soude dat oec onder Romen brengen. Ende hi quam te Damas. Bi rade van Antipater so togen die twee bruederen te recht voir Pompeyus. Ende Antipater sprac mit Pompeyus, sodat hi Yrcaen dat bisdom toewijsde. Dat en genoechde Aristobulus niet. Ende hi toech mit sinen volc haestelic in Jherusalem. Ende Pompeyus volch\de

[fol. 240vb]

hem ende belach Jherusalem. Ende bi hulp van Yrcaens vrienden so quam Pompeyus in Jherusalem, doe hi daer 3 maenden voir gelegen hadde. Ende Aristobulus weec doe in den tempel. Ende Pompeyus wan hem den tempel of. Ende die Romeynen ontsuverden den tempel ende stalden haer paerden daerin. Doe quam Pompeyus ende besach den tempel binnen. Doe hi die grote cyerheit sach van goude ende van costelicheit, doe hiet hi den tempel suveren ende scoen maken. Mer hi en nam daer niet uut. Ende hi maecte Yrcaen biscop, als hi was in Jherusalem. Ende Aristobulus hielt hi gevaen mit 4 kinderen, als Alexander, Antigonus ende twee dochteren, ende voerdese te Romen te gisel. Ende dat lant van Judeen dat sette hi te tijnse. Ende hi gaf die voechdie daerof een, genoemt Scaruse. Ende die voechdie van Cyryen dat gaf hi Gabinus.