Noordnederlandse Historiebijbel

[7]

Doe nam die coninc Aman sijn vingerlinc ende gaf dat Merdocheus. Ende hi gaf Merdocheus alle die macht die Aman hadde al sijn lant te regieren. Ende hi geboet hem dat men Aman an die galge hangen soude die hi selve gemaect hadde. Ende daertoe gaf die coninc Merdocheus Amans huys ende hof ende al sijn guet. Doe screef Merdocheus enen brief over al dat lant dat men al die joden die gevangen waren, vry soude laten gaen uut der vangenisse. Ende hi geboet alle diegene die die joden gewroecht hadden totter vangenisse, dat men die soude doden. Ende doe dede Merdocheus Aman hangen an die galge die hi selve hadde doen maken mit 15 van sinen kinderen ende van sinen vrienden. Ende Merdocheus deder binnen der stat van Susen 800 doden. Ende binnen den lande van Percen ende van Meden so dede Merdocheus doden sijn vianden, meer dan 75.000. Ende voel heydenen die namen

[fol. 222vb]

an die joetsche wet. Ende si dienden den almachtigen God. Aldus worden die joden verlost van der doot overmits Hester, der coninghinnen. Doe bekende Merdocheus den droem die hem gedroemt was van die twee dieren die vochten ende hoe die een den anderen verwan. Dat beteykende Merdocheus ende Aman. Ende Hester was van een cleyn fonteyne geworden een groet water, een groet vloet.

Dat van Hester dat is een figuer, want Aman dat was die duvel. Die hadde een galge gemaect der ewiger pinen om die menschen daermede te pinen. Omdat Adam dat gebot Gods gebroken hadde, so was die sentencie der ewiger verdomenis gegeven. Mer doe quam Hester. Dat is die hemelsche coninghinne Maria. Ende si heeft die sentencie verwandelt. Ende die galge der pinen die die duvel ons bereit hadde, daer blijft hi selve in gepijnt. Ende wi mogen die pijn ontgaen ende salich worden, willen wi selve. Daerom, laet ons Maria, die coninghinne, dienen, minnen ende eren, opdat wi die helsche pijn mogen ontgaen.

In Asswerus tiden so quam die hertoech Bremmus uut Vrancrijc ende wan Romen ende verbarndet meest al temael. Ende doe ghinc Aristotiles ter scolen onder sinen meester Plato.

Doe Asswerus doot was, doe wort

[fol. 223ra]

sijn soen coninc van Percen ende van Meden, die genoemt was Ochus. Ende die coninc Ochus die beval dat lant van Syrien te berechten enen man, genoemt Vagosus. Ende in Jherusalem was doe enen biscop, die hiet Johan. Ende die Johan die hadde enen brueder, die hiet Yasus. Ende die Jasus sprac mit Vagosus, omdat hi hem biscop maken soude te Jherusalem. Ende doe si binnen Jherusalem quamen, doe ghinc Yasus in den tempel ende woude sinen brueder verdriven. Ende doe worden si vechtende. Ende Johan die sloech Yasus sinen brueder doot in den tempel. Doe was Vagosus toornich ende beruspede Johan, den biscop, ende beroefde Jherusalem ende settede den tijns weder op Jherusalem, die bi Esdras tiden ofgedaen was.

Die coninc Ochus die toech striden jegen den coninc van Egipten, die genoemt was Septabanus. Ende hi was meester in astronomien ende oec in der swarter consten. Ende hi sach in den teykenen des hemels dat hi verwonnen soude worden. Doe toech hi uut sinen conincrijc in een vreemt lant. Ende hi quam in Grieken tot des conincs hof van Machedonien ende daer diende hi mede. Ende coninc Ochus die behielt Egipten. Ende in Ochus tiden so verwonnen die Romeynen die Gallen van Vrancrijc. Ende doe starf Plato, die phylosoeph.

[fol. 223rb]

Ende na Ochus wort Arsanus coninc van Percen ende van Meden. Ende Johan, die biscop van Jherusalem, die starf. Ende Yadus, sijn soen, die wort biscop in Jherusalem.

Explicit Hester.

Et sic est finis, sit laus et gloria Trinis.

Hoc opus exegi, Cristo sit gloria Regi.